மாற்றுத்திறனாளிகளுக்கான புள்ளி விபரங்கள் கணக்கெடுப்பு: பயன்பெற கலெக்டர் அழைப்பு

மாற்றுத்திறனாளிகளுக்கான சமூக தரவு புள்ளி விபரங்கள் கணக்கெடுப்பு பணி மேற்கொள்ளப்பட்டுள்ளது. அவற்றில் பதிவு செய்து பயன்பெறலாம் என கலெக்டர் தெரிவித்துள்ளார்.

இது குறித்து, நாமக்கல் மாவட்ட கலெக்டர் உமா வெளியிட்டுள்ள செய்திக்குறிப்பில் கூறியுள்ளதாவது:

மாற்றுத்திறனாளிகள் நலத்துறை சார்பில், உரிமைகள் திட்டம் செயல்படுத்தப்பட்டு வருகிறது. இத்திட்டத்தில், மாற்றுத்திறனாளிகளுக்கான சமூகத் தரவு புள்ளி விபரஙகள் பதிவு செய்யும் பணி, 2023 செப்டம்பர் துவங்கி, டிசம்பர் வரை, இரண்டு கட்டங்களாக செயல்படுத்தப்பட்டு வருகிறது. முதற்கட்டமாக, 5 மாவட்டங்களில் சமூகத் தரவு பதிவு நடத்தப்பட்டது. அதைதொடர்ந்து மீதம் உள்ள, 33 மாவட்டங்களில் தொடங்க திட்டமிடப்பட்டு, நாமக்கல் மாவட்டத்தில், 2023, டிசம்பர் 5ல் தல் கணக்கெடுக்கும் பணி தொடங்கி நடந்து வருகிறது.

இக்கணக்கெடுப்பில், தமிழக நகர்புற வாழ்வாதார இயக்க களப்பணியாளர்கள், தமிழக மகளிர் மேம்பாட்டு நிறுவன இயக்க களப்பணியாளர்கள் என, தகவல் சேகரிக்கும் பணியை, 398 களப்பணியாளர்கள் மேற்கொண்டுள்ளனர்.

இக்கணக்கெடுப்பிற்காக உருவாக்கப்பட்டுள்ள செயலியில், தகவல்கள் பதிவு செய்யப்படும். இத்திட்டத்தின் மூலம், பல்வேறு நலத்திட்டங்கள், ஒருங்கிணைந்த சேவை மையங்கள், கோட்டம் மற்றும் வட்டார அளவில் செயல்படுத்தப்பட உள்ளன. இம்மையத்தில் பிசியோதெரபி, பேச்சுப்பயிற்சி, மறுவாழ்வு மையங்கள் போன்ற சேவைகள் வழங்கப்பட உள்ளது.

நாமக்கல் மாவட்டத்தில் உள்ள அனைத்து மாற்றுத்திறனாளிகளும், தங்கள் தகவல்களை கணக்கெடுப்பிற்கு வருகை தரும் களப்பணியாளர்களிடம், மாற்றுத்திறாளிகளுக்கான அடையாள அட்டை, ஆதார், ரேசன், யு.டி.ஐ.டி. அட்டை, வாக்காளர் அட்டை என, 5 ஆவணங்களை சமர்ப்பித்து பதிவு செய்து பயன்பெறலாம். மேலும், விபரங்களுக்கு, கலெக்டர் அலுவலக தரை தளத்தில் செயல்படும் மாவட்ட மாற்றுத்திறனாளிகள் நல அலுவலகத்தை நேரிலோ அல்லது 94999 33483 என்ற மொபைல் எண்ணிலோ தொடர்பு கொள்ளலாம் என கலெக்டர் தெரிவித்துள்ளார்.