நாமக்கல் மாவட்டத்தில் 10 ஆசிரியர்களுக்கு நாளை நல்லாசிரியர் விருது

மாணவர்களின் அறிவுக் கண்ணைத் திறக்கும் ஆசிரியராகத் தன்னுடைய வாழ்வைத் தொடங்கி, இந்திய நாட்டின் குடியரசுத் தலைவராக உயர்ந்து, ஆசிரியர் சமுதாயத்திற்குப் பெரும் சிறப்பினைச் சேர்த்த டாக்டர் ராதாகிருஷ்ணனின் பிறந்த தினமான செப்டம்பர் 5ம் தேதி ஒவ்வொரு ஆண்டும் ஆசிரியர் தினமாகக் கொண்டாடப்படுகிறது. இந்நாளில் சிறந்த கல்வித் தொண்டாற்றும் நல்லாசிரியர்களுக்கு டாக்டர் ராதாகிருஷ்ணன் விருது வழங்கி தமிழ்நாடு அரசு கவுரவித்து வருகிறது. அந்த வகையில், இந்த ஆண்டு நாமக்கல் மாவட்டத்தில் சிறந்த முறையில் பணியாற்றிய ஆசிரியர்களை ஊக்குவிக்கும் வகையில் தமிழ்நாடு அரசின் பள்ளிக் கல்வித்துறையின் கீழ் செயல்படும் பல்வேறு பள்ளிகளில் பணிபுரியும் ஆசிரியர்களில் 10 ஆசிரியர்கள் நல்லாசிரியர் விருதுக்குத் தேர்வு செய்யப்பட்டுள்ளனர்.

இதில் நாமக்கல் மாவட்ட ஆசிரியர் கல்வி மற்றும் பயிற்சி நிறுவன விரிவுரையாளர் செல்லதுரை, நாமக்கல் அரசு மகளிர் மேல்நிலைப்பள்ளி ஆசிரியர் குமரேசன், அணியாபுரம் அரசு மேல்நிலைப்பள்ளி ஆசிரியர் மாதேஸ்வரன், திருச்செங்கோடு அரசு ஆண்கள் மேல்நிலைப்பள்ளி ஆசிரியர் திருவருள்செல்வன், ரெட்டிப்பட்டி பாரதி மேல்நிலைப்பள்ளி ஆசிரியர் நாராயணமூர்த்தி, புதுச்சத்திரம் ஊராட்சி ஒன்றியம் காரைக்குறிச்சி துவக்கப்பள்ளி ஆசிரியர் லதா, கொல்லிமலை ஒன்றியம் சோலுடையப்பட்டி ஊராட்சி ஒன்றிய துவக்கப்பள்ளி தலைமை ஆசிரியர் சதாசிவம், மோகனூர் ஒன்றியம் ஒருவந்தூர் புதூர் துவக்கப்பள்ள தலைமை ஆசிரியர் சத்தியமூர்த்தி, மோகனூர் ஒன்றியம் மேலப்பட்டி துவக்கப்பள்ளி தலைமை ஆசிரரியர் அண்ணாதுரை, திருச்செங்கோடு காளிப்பட்டி மகேந்திரா மெட்ரிக் பள்ளி முதல்வர் ஆனந்த் ஆகியோர் தேர்வு செய்யப்பட்டுள்ளனர்.

இதையடுத்து நாளை (5ம் தேதி) கலெக்டர் ஸ்ரேயாசிங் தலைமையில் நல்லாசிரியர் விருது வழங்கும் விழா நடைபெறுகிறது. நாமக்கல் கலெக்டர் அலுவலகத்தில் நடைபெறும் நல்லாசிரியர் விருது வழங்கும் விழாவில் சுற்றுலாத்துறை அமைச்சர் மதிவேந்தன் பங்கேற்று விருதுகளை வழங்குகிறார்.