தொலை தொடர்புத் துறை பெயரில் போலி அழைப்புகள்: மத்திய அரசு எச்சரிக்கை

தொலைத்தொடர்பு அதிகாரிகள் போல் பேசி நிதி மோசடிக்கு முயற்சி செய்யும் போலி செல்போன் அழைப்புகளை நம்பி ஏமாற வேண்டாம் என்று பொதுமக்களுக்கு மத்திய அரசு எச்சரிக்கை விடுத்து உள்ளது.

மத்திய அரசின் தொலைதொடர்பு துறை பொதுமக்களுக்கு ஒரு எச்சரிக்கை அறிவிப்பை வெளியிட்டுள்ளது. அதில் கூறப்பட்டுள்ளதாவது:- தொலைதொடர்புத் துறை அல்லது இந்திய தொலைத்தொடர்பு ஒழுங்குமுறை ஆணையரக அதிகாரிகள் போல் சில இணைய குற்றவாளிகள் பொதுமக்களை தொடர்பு கொண்டு பேசி நிதி மோசடியில் ஈடுபடுவதாக புகார்கள் வந்துள்ளன.

அவர்கள் அதிகாரிகள் போல் நடித்து உங்கள் செல்போன் இணைப்பை துண்டிப்போம். என்றோ அல்லது உங்கள் செல்போன் சட்டவிரோத காரியங்களுக்கு பயன்படுத்தப்படுகிறது என்றோ மிரட்டுவார்கள். அதன் மூலம் தனிப்பட்ட தகவல்களை திருடி இணைய குற்றங்களிலோ அல்லது நிதி மோசடியிலோ ஈடுபடுவார்கள். இதுபோன்று தங்கள் சார்பில் பேசுவதற்கு தொலைதொடர்பு துறையோ அல்லது ட்ராய் அமைப்புகளோ யாருக்கும் அதிகாரம் அளிக்கவில்லை.

ஆகவே போலி செல்போன் அழைப்புகளை ஏற்க வேண்டாம் என்றும் நம்பி ஏமாற வேண்டும் என்றும் ஏமாற வேண்டாம் என்றும் பொதுமக்களை கேட்டுக்கொள்கிறோம். அவர்களிடம் விழிப்புடன் இருக்க வேண்டும். மோசடி அழைப்புகள் குறித்து மத்திய அரசுக்கு உடனடியாக தெரிவிக்க வேண்டும். இதன் மூலம் இணைய குற்றங்களுக்கு தொலைதொடர்பு இனங்களை தவறாக பயன்படுத்துவதை தடுக்க முடியும். இணைய குற்ற உதவி மைய எண் 1930ல் தொடர்பு கொள்ளலாம். இணையத்திலும் புகார் அளிக்கலாம். இவ்வாறு அதில் கூறப்பட்டுள்ளது.

அரசு அதிகாரிகள் போல் 92 என்ற வெளிநாட்டு செல்போன் எண்ணில் தொடங்கும் வாட்ஸ் அப் அழைப்புகளில் பேசும் மோசடியாளர்கள் குறித்து தொலைதொடர்புத் துறை ஏற்கனவே எச்சரிக்கை விடுத்து உள்ளது என்பது குறிப்பிடத்தக்கது. கடந்த வாரம் மத்திய உள்துறை அமைச்சகம் தொலைதொடர்புத்துறை, மாநில போலீஸ் ஆகியவை இணைந்து நடந்திய கூட்டு நடவடிக்கையில் 28 ஆயிரத்து 200 செல்போன்களும், 20 லட்சம் செல்போன் எண்களும் இணைய குற்றங்களுக்கு பயன்படுத்தப்பட்டது தெரிய வந்தது. அதனால் அந்த செல்போன்களையும் எண்களையும் முடக்க தொலை தொடர்பு உத்தரவிட்டு உள்ளது.