கொல்லிமலையில் சிறுத்தை நடமாட்டம் இல்லை: மாவட்ட வன அதிகாரி விளக்கம்

கொல்லிமலை வனப்பகுதியில் சிறுத்தை நடமாட்டம் இருப்பதற்கான ஆதாரம் எதுவும் இல்லை என வனத்துறையினர் தெரிவித்துள்ளனார்.

இது குறித்து நாமக்கல் மாவட்ட வன அலுவலர் ராஜாங்கம் கூறியுள்ளதாவது: திருச்சி மாவட்டம் உப்பிலியாபுரம் அருகே ஆங்கியம் கிராமத்தில், சிறுத்தை கடித்ததில் படுகாயம் அடைந்த 2 பேர் நாமக்கல் அரசு மருத்துவக் கல்லூரி ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர். இந்நிலையில் அப்பகுதியில் உலவி வந்த சிறுத்தை, நாமக்கல் மாவட்டம் கொல்லிமலை வனப்பகுதியில் ஊடுருவியுள்ளதாக தகவல் வெளியாகியுள்ளது. எனினும், கொல்லிமலை வனச்சரகத்திற்கு உட்பட்ட கொல்லிமலை, புளியஞ்சோலை உள்ளிட்ட வனப்பகுதிக்குள் சிறுத்தை நுழைந்துள்ளதாக எந்த ஆதாரமும் இல்லை. அதனால் கூண்டு வைத்து பிடிக்கவோ அல்லது கண்காணிக்கவோ எவ்வித நடவடிக்கையும் இதுவரை மேற்கொள்ளப்படவில்லை. சிறுத்தை நடமாட்டம் இருப்பது உறுதி செய்யப்பட்டால் கூண்டு வைத்தல், கேமரா மூலம் கண்காணிப்பு செய்தல் போன்றவற்றை மேற்கொள்ளும்படி அறிவுறுத்தப்பட்டுள்ளது. தற்போது நாமக்கல் மாவட்ட கலெக்டர் உத்தரவின்படி கொல்லிமலையில் உள்ள அனைத்து அருவிகள் மற்றும் நீர்நிலைகளுக்கு சுற்றுலாப் பயணிகள் மற்றும் பொதுமக்கள் செல்ல தடைவிதிக்கப்பட்டுள்ளது என்று கூறியுள்ளார்.