மதுக்கடையை மூடக் கோரி எமன், சித்ரகுப்தர் வேடமிட்டு பாஜக நூதன ஆர்பாட்டம்

காஞ்சிபுரம் நகரில் மேட்டுத்தெரு, பேருந்து நிலையம் செங்கழுநீரோடை வீதி ஆகிய பகுதிகளில் செயல்பட்டு வரும் மதுபானக் கடைகள் பொதுமக்களுக்கு பெரிதும் இடையூறாக இருப்பதாகவும் பேருந்து நிலையம் அருகே உள்ள சித்ரகுப்தர் கோயில் அருகே பக்தர்களுக்கு பெரும் சிரமத்தை மதுபானக்கடை ஏற்படுவதாக மாவட்ட நிர்வாகத்திற்கு தொடர்பு புகார் வந்தது.

மாவட்ட ஆட்சியர் அலுவலக வளாகத்தில் நடைபெற்ற நிகழ்ச்சியில் அமைச்சர் தா.மோ அன்பரசன் பொதுமக்களிடம் மனு வாங்கிய போதும் இது குறித்து புகார் தெரிவிக்கப்பட்டவுடன் இடம் மாற்றம் செய்ய அறிவுறுத்தினார்.

ஆனால் தற்போது வரை இடமாற்றம் செய்யப்படாத காரணத்தால் காஞ்சிபுரம் மாவட்ட பாஜக ஆன்மீகம் மற்றும் ஆலய மேம்பாட்டு பிரிவு தலைவர் அதிசயம் குமார் தலைமையில் வட்டாட்சியர் அலுவலகம் அருகே கண்டன ஆர்ப்பாட்டம் நடைபெற்றது.

இதில் மாவட்ட நிர்வாகத்தின் அலட்சிய போக்கை கண்டித்து மாவட்ட தலைவர் பாபு உள்ளிட்ட பல்வேறு நிர்வாகிகள் கண்டன உரையாற்றினர்.

இதன்பின் சித்திரகுப்தர் , எமன் மற்றும் குடிமகன் ஆகிய மூன்று வேடமிட்ட நபர்கள் குடியினால் ஏற்படும் தீமைகள் மற்றும் அரசு மதுபான கடை விதிமீறல்கள் உள்ளிட்டவைகளை குறு நாடகமாக நடித்து பொது மக்களுக்கு விழிப்புணர்வு ஏற்படுத்தினர்.

நகைச்சுவை கலந்த உள்ளூர் பாஷையில் சித்திரகுப்தன் எமன் உள்ளிட்டோர் பேசியது அவ்வழியே சென்ற அனைவரையும் ஒரு நிமிடம் நிற்க வைத்து பார்க்கும் படி செய்தது வரவேற்பை பெற்றுள்ளது

காஞ்சிபுரம் நகரில் உள்ள அனைத்து மதுபான கடைகளில் புறநகர் பகுதியில் அமைக்க வேண்டும் என கோரிக்கை நீண்ட நாட்களாகவே பல்வேறு தரப்பிலிருந்து எழுப்பப்பட்டு வருகிறது. ஆனால் டாஸ்மாக் நிர்வாகமும் ஒவ்வொரு முறையும் இது குறித்த புகாருக்கு பதில் அளிக்கையில் இடம் பார்த்துக் கொண்டிருப்பதாகவும் விரைவில் மாற்றப்படும் எனவும் கூறி கடந்த ஓராண்டை தாண்டி தற்போதும் அதே பதில் மீண்டும் கூட்டங்களை தெரிவிக்கப்படுகிறது.

இது அனைவருக்கும் அதிர்ச்சியும் ஏமாற்றத்தையுமே அளிக்கிறது.