சிவகங்கை அருள்மிகு காசி விஸ்வநாதர் திருக்கோயில் ஆருத்ரா தரிசன விழா

சிவகங்கை மாவட்டம் சிவகங்கை நகர் மையப்பகுதியில் அமைந்துள்ள பிரசித்தி பெற்ற மிகப் பழமையான அருள்மிகு ஸ்ரீ விசாலாட்சி அம்மன் சமேத ஶ்ரீ காசி விஸ்வநாதர் சுவாமி திருக்கோவிலில் ஆருத்ரா தரிசன திருநாள் முன்னிட்டு சிறப்பு அபிஷேக ஆராதனைகள் வெகு விமரிசையாக நடைபெற்றன

முன்னதாக உற்சவர்கள் ஸ்ரீநடராஜப் பெருமான், ஸ்ரீ மாணிக்கவாசகர், சிவகாமி அம்மன் ஆகியோர் சர்வ அலங்காரத்தில் அருள் பாலித்தனர். தொடர்ந்து சிறப்பு பூஜைகள் நடைபெற்று கோபுர தீபம், கும்ப தீபம், நாக தீபம் மற்றும் வில்வத்தால் அர்ச்சனைகள் செய்யப்பட்டன

பின்னர் சுவாமி சன்னதி எதிரே கோ பூஜை நடைபெற்று பசு கன்றுக்கு உதிரிப்பூக்கள் கொண்டு அர்ச்சனைகள் செய்து அஷ்டலட்சுமிகள் அருள் பாலிக்கும் பசு மாட்டின் பின்பகுதியில் கண்ணாடியை வைத்து சுவாமிக்கும் பசுமாட்டிற்கும் ஒரே நேரத்தில் வேத மந்திரங்கள் முழங்க மகா தீபாரதனை காண்பிக்கப்பட்டன

பக்தர்கள் பக்தி பரவசத்துடன் ஆருத்ரா தரிசன நிகழ்வை கண்டு வழிபட்டனர். இதனையடுத்து தெய்வங்களுக்கு சிறப்பு பூஜைகள் நடத்தி இரண்டு பஞ்சமுக மகா தீபாராதனை காட்டப்பட்டது. இதில் ஏராளமான பக்தர்கள் கலந்து கொண்டு ஸ்ரீ நடராஜப் பெருமானை வழிபட்டனர்.