நாமக்கல்லில் 5.37 லட்சம் குடும்பங்களுக்கு பொங்கல் பரிசு தொகுப்பு: அமைச்சர் துவக்கம்

நாமக்கல் மாவட்டத்தில் 5.37 லட்சம் ரேசன் கார்டுகளுக்கு பொங்கல் பரிசு தொகுப்பு வழங்கும் திட்டத்தை அமைச்சர் மதிவேந்தன் துவக்கி வைத்தார்.

நாமக்கல் நகராட்சி, முல்லை நகர் ரேசன் கடையில், ரேசன் கார்டுதாரர்களுக்கு, தமிழக அரசின் பொங்கல் பரிசு தொகுப்பு வழங்கும் நிகழ்ச்சி தொடக்க விழா நடைபெற்றது. மாவட்ட கலெக்டர் ஸ்ரேயாசிங் தலைமை வகித்தார். ராஜ்யசபா எம்.பி ராஜேஷ்குமார், எம்எல்ஏக்கள் நாமக்கல் ராமலிங்கம், சேந்தமங்கலம் பொன்னுசாமி ஆகியோர் முன்னிலை வகித்தனர். சுற்றுலாத்துறை அமைச்சர் மதிவேந்தன் நிகழ்ச்சியில் கலந்துகொண்டு பொங்கல் பரிசுத்தொகுப்புகளை வழங்கிப் பேசினார்.

அப்போது, தமிழக முதல்வர் ஸ்டாலின் உத்தரவின்பேரில் நாமக்கல் மாவட்டத்தில், 5 லட்சத்து 37 ஆயிரத்து 510 ரேசன் கார்டுதாரர்களுக்கு ரூ.ரூ.28.91 கோடி மதிப்பில் 21 பொருட்கள் அடங்கிய பொங்கல் பரிசுத்தொகுப்புகள் வழங்கப்படுகிறது. பொதுமக்கள் அனைவரும் சமூக இடைவெளியுடன், குறிப்பிட்ட நாட்களில் ரேசன் கடைகளுக்குச் சென்று பொருட்களைப் பெற்று பொங்கல் பண்டிகையை மகிழ்ச்சியுடன் கொண்டாட வேண்டும் என்று அவர் கேட்டுக்கொண்டார்.

மாவட்ட ஊராட்சி குழு துணைத்தலைவர் செந்தில்குமார், கூட்டுறவு சங்கங்களின் இணைப்பதிவாளர் செல்வக்குமரன், என்சிஎம்எஸ் துணைப்பதிவாளர் ரவிச்சந்திரன், மாவட்ட வழங்கல் அலுவலர் சக்திவேலு, பிஆர்ஓ சீனிவாசன் உள்ளிட்ட பலர் நிகழ்ச்சியில் கலந்து கொண்டனர்.