பொய்யான சோதனைகள், வழக்குகள் மூலம் அதிமுகவை பயமுறுத்த வேண்டாம்:முன்னாள் அமைச்சர்

முன்னாள் அமைச்சர் வேலுமணி வீட்டில் நடந்த சோதனை குறித்து முன்னாள் அமைச்சர் திண்டுக்கல் சி .சீனிவாசன் கூறும்போது, முன்னாள் அமைச்சர் வேலுமணி இல்லத்தில் சோதனைகள் செய்யப்பட்டதாக செய்தி வந்திருக்கிறது. இது அப்பட்டமான பழிவாங்கும் நடவடிக்கை என்பதில் மாற்றுக் கருத்து கிடையாது. திமுக ஆட்சிக்கு வந்த நாளிலிருந்து இன்று வரை அதிமுகவினர் மீது பொய் வழக்கு போட்டு அவர்களை அடிபணிய வைத்து விடலாம் என்று நினைத்துக் கொண்டிருக்கிறார்கள் .

எடப்பாடி, ஓ பி எஸ் இருவரும் இன்று கூட்டாக அறிக்கை கொடுத்திருக்கிறார். அதிலே பொய்யான வழக்குகள் போடக்கூடாது. எதுவாக இருந்தாலும் நீதிமன்றத்தில் சந்தித்து நாங்கள் நிரபராதி என்று காட்டுவோம் என்று அறிக்கையாக வெளியிட்டிருக்கிறார்கள். இரண்டாவது முறையாக இந்த சோதனை நடந்து இருக்கிறது. கோயம்புத்தூர், திருப்பூர், பொள்ளாச்சி, உடுமலைப்பேட்டை ஆகிய பகுதிகளில் அதிமுக எம்எல்ஏக்கள் அறுதிப் பெரும்பான்மையுடன் வெற்றி பெற்றார்கள். கோவை மாவட்டத்தின் மக்களின் அன்பை பெற்றவராக இருப்பதினால் வழக்குப் போட்டு பிரித்து விடலாம் என்று நினைக்கிறார்கள். அது ஒருபோதும் பகல் கனவாக இருக்குமே தவிர நிச்சயமாக அவருக்கு எதிரான நடவடிக்கையாக இருக்க முடியாது.

தேர்தல் நடக்கும் முன்பே அவர் மீது பல புகார்கள் கொடுத்து குற்றவாளியைப் போல் காட்டினார்கள். அத்தனையும் மீறி கோவை மாவட்டத்தில் அதிகமான எம்எல்ஏக்கள் வெற்றி பெற்றிருக்கிறார்கள். அதன் மூலம் 75 எம்எல்ஏக்கள் அண்ணா திமுக பெற்றிருக்கிறது. இந்த பலம் உள்ளாட்சி தேர்தலில் கூடுமே தவிர குறையாது. இது போன்ற பழிவாங்கும் நடவடிக்கைகளை திமுக நிறுத்த வேண்டும்.

இதுபோல் திமுகவின் முன்னாள் அமைச்சர்கள் மீது போடப்பட்ட சொத்துக்குவிப்பு வழக்கு நீதிமன்றத்தில் இருக்கிறது. அதனுடைய தீர்ப்புகள் வரும் பொழுதுதான் மக்களுக்கு உண்மை என்னவென்று தெரியும். எனவே இந்த பழிவாங்கும் நடவடிக்கையை திமுக நிறுத்திக் கொண்டால் அவர்கள் வளர்ச்சிக்கு நிச்சயமாக உதவும். இதுபோன்ற பொய்யான சோதனைகள், பொய்யான வழக்குகள் மூலம் அதிமுகவை பயமுறுத்த வேண்டாம் என்று கூறினார்.