புதுச்சத்திரம் அரசு ஆரம்ப சுகாதார நிலையத்தில் எம்எல்ஏ ராமலிங்கம் ஆய்வு
நாமக்கல் மாவட்டம், புதுச்சத்திரம் அரசு ஆரம்ப சுகாதார நிலையத்தில் எம்எல்ஏ ராமலிங்கம் ஆய்வு மேற்கொண்டார்.
HIGHLIGHTS
நாமக்கல் சட்டசபை தொகுதிக்குட்பட்ட பகுதிகளில், மக்களைத்தேடி எம்எல்ஏ என்ற திட்டத்தின் கீழ், எம்எல்ஏ ராமலிங்கம் பொதுமக்களின் இருப்பிடங்களுக்கே நேரில் சென்று அவர்களின் குறைகளை கேட்டறிந்து வருகிறார். இதையொட்டி, புதுச்சத்திரம் ஊராட்சி ஒன்றியத்தில் நவணி, தாத்தையங்கார்பட்டி, காரைக்குறிச்சி புதூர் முதல் செல்லப்பட்டி வரை உள்ள கிராமங்களில், எம்எல்ஏ ராமலிங்கம் சுற்றுப்பயணம் செய்து பொதுமக்களை சந்தித்து குறைகளை கேட்டறிந்து மனுக்களைப் பெற்றார்.
தொடர்ந்து, புதுச்சத்திரம் அரசு ஆரம்ப சுகாதார நிலையத்தை அவர் பார்வையிட்டு ஆய்வு செய்தார். அப்போது, மருத்துவ அலுவலர் சுதாவிடம், நோயாளிகளின் வருகை, வழங்கப்பட்டு வரும் சிகிச்சை முறைகள், மருந்துகள் இருப்பு ஆகியவை குறித்து கேட்டறிந்தார். சிகிச்சை பெற்று வரும் நோயாளிகளைப் பார்வையிட்டு சிகிச்சை குறித்து கேட்டறிந்தார். மக்களை தேடி மருத்துவம் திட்டத்தின் கீழ் சிகிச்சை பெற்று வரும் நோயாளிகளின் விவரங்கள் குறித்து கேட்டறிந்து, மருத்துவ பணியாளரிடம் மருந்து பெட்டகங்களை வழங்கினார். ஒன்றிய திமுக செயலாளர் கவுதம் உள்ளிட்ட பலர் நிகழ்ச்சிகளில் கலந்து கொண்டனர்.