தூத்துக்குடியில் திருநங்கைகள் 4 பேர் அதிரடி கைது.. பொதுமக்களை தாக்கி செல்போன், பைக் பறித்ததாக புகார்..

தூத்துக்குடி மாவட்டத்தில் சாலையோரங்களில் நடந்து செல்வோரிடம் திருநங்கைகள் சிலர் பணம் கேட்டு மிரட்டுவதாகவும், பணம் கொடுக்க மறுப்பவர்களை தாக்குவதாகவும் தொடர்ந்து புகார்கள் தெரிவிக்கப்பட்டது. இதுதொடர்பாக, காவல்துறை நடவடிக்கை எடுக்க வேண்டும் என வலியுறுத்தப்பட்டது.

இந்த நிலையில், தூத்துக்குடி முத்தையாபுரம் சுந்தர்நகரைச் சேர்ந்த ஜெகதீசன் (65) என்பவர் கடந்த 16 ஆம் தேதி தூத்துக்குடி பழைய பேருந்து நிலையம் அருகே இருசக்கர வாகனத்தில் நின்று கொண்டிருந்த போது, அங்கு வந்த சில திருநங்கைகள் ஜெகதீசனிடம் பணம் கேட்டுள்ளனர்.

அவர் பணம் கொடுக்க மறுப்பு தெரிவித்ததால் ஆத்திரமடைந்த அந்த திருநங்கைகள் ஜெகதீசனை தாக்கி அவரது இருசக்கர வாகனம் மற்றும் சாவியையும் பறித்து உள்ளனர். மேலும் அங்கு இருந்த மேற்கு வங்காளம் மாநிலத்தைச் சேர்ந்த ஷரிப்புதின் மகன் சசீருதின் (33) என்பவரையும் அடித்து அவரிடம் இருந்த செல்போனையும் திருநங்கைகள் பறித்துச் சென்றுள்ளனர். இதுகுறித்து இதுகுறித்து ஜெகதீசன் அளித்த புகாரின் பேரில் மத்தியபாகம் காவல் நிலைய போலீஸார் வழக்குபதிவு செய்து விசாரணை மேற்கொண்டனர்.

மேலும், இந்த சம்பவம் குறித்து மாவட்ட காவல் கண்காணிப்பாளர் பாலாஜி சரவணன் உத்தரவின்படி, தூத்துக்குடி நகர காவல் துணை கண்காணிப்பாளர் சத்தியராஜ் மேற்பார்வையில், மத்தியபாகம் காவல் நிலைய ஆய்வாளர் அய்யப்பன் தலைமையிலான போலீஸார் விசாரணை மேற்கொண்டனர்.

சம்பவம் நிகழ்ந்த இடங்களில் இருந்த சிசிடிவி கேமராக்களில் பதிவான காட்சிகளின் அடிப்படையில் போலீஸார் விசாரணை மேற்கொண்டதில், இருரையும் தாக்கி இருசக்கர வாகனம் மற்றும் செல்போன் கொள்ளை முயற்சியில் ஈடுபட்டது பாளையங்கோட்டையைச் சேர்ந்த செல்வம் மகள் யாசிகா என்ற அபினேஷ் (19), காயல்பட்டினத்தைச் சேர்ந்த சொக்கலிங்கம் மகள் வென்னிலா (எ) செல்வகணபதி (25), தூத்துக்குடி போல்டன்புரத்தைச் சேர்ந்த மாரிமுத்து மகள் ஷீபா (எ) முத்துராஜ் (19) மற்றும் பாளையங்கோட்டை எம்ஜிஆர் நகரைச் சேர்ந்த சக்திவேல் மகள் பாவனா என்ற சரவணகுமார் (21) ஆகிய திருநகங்கைகள் என்பது தெரியவந்தது.

இதைத்தொடர்ந்து, திருநங்கைகள் 4 பேரையும் கைது செய்த போலீஸார், அவர்களிடம் இருந்து ஒரு லட்சம் ரூபாய் மதிப்பிலான இருசக்கர வாகனம் மற்றும் 12,000 ரூபாய் மதிப்பிலான செல்போன் ஆகியவற்றை பறிமுதல் செய்தனர். மேலும் இதுகுறித்து மத்தியபாகம் காவல் நிலைய போலீஸார் தொடர்ந்து விசாரணை மேற்கொண்டு வருகின்றனர்.

இதுபோன்று சட்ட விரோத செயல்களில் ஈடுபடும் திருநங்கைகள் குறித்து பொதுமக்கள் அவசர போலீஸ் தொலைபேசி எண் 100 மற்றும் 95141 44100 என்ற எண்ணிற்கு தகவல் அளித்தால் உடனடியாக நடவடிக்கை எடுக்கப்படும் என மாவட்ட காவல் கண்காணிப்பாளர் பாலாஜி சரவணன் தெரிவித்துள்ளார்.