தென்காசி மாவட்ட தேர்வு மையங்களில் மாவட்ட ஆட்சியர் ஆய்வு

தமிழக முழுவதும் இன்று பிளஸ் 2 தேர்வானது தொடங்கியது. இந்நிலையில், இன்று தென்காசி மாவட்டம் தென்காசி பகுதியில் செயல்பட்டு வரும் மஞ்சம்மாள் அரசு பெண்கள் மேல்நிலைப் பள்ளியில் நடைபெற்ற பிளஸ் 2 தேர்வினை தென்காசி மாவட்ட ஆட்சியர் துரை.ரவிச்சந்திரன் ஆய்வு மேற்கொண்டார்.

மேலும், தேர்வு எழுதும் மாணவர்களுக்கு செய்யப்பட்டுள்ள சிறப்பு வசதிகள் குறித்து முதன்மை கல்வி அலுவலரிடம் கேட்டு தெரிந்து கொண்டார். அதனைத் தொடர்ந்து, செய்தியாளர்களுக்கு அவர் அளித்த பேட்டியில் கூறியதாவது:

தென்காசி மாவட்டத்தில் பிளஸ் 2 மற்றும் பிளஸ் 1 தேர்வு எழுதும் மாணவ, மாணவிகளுக்கு தேவையான அனைத்து சிறப்பு ஏற்பாடுகளும் செய்யப்பட்டுள்ளது. தென்காசி மாவட்டத்தில் மொத்தம் 18 ஆயிரத்து 299 மாணவ, மாணவிகள் +2 பொதுத்தேர்வை எழுதுகின்றனர்.

இன்று 13.03.2023 முதல் 05.04.2023 முடிய மேல்நிலை இரண்டாம் ஆண்டு பொதுத்தேர்வுகள் நடைபெற உள்ள சூழலில், +2 பொதுத்தேர்விற்காக 64 தேர்வு மையங்கள் மாவட்டம் முழுவதும் அமைக்கப்பட்டுள்ளது. அதேபோல், 1,322 சிறப்பு கண்காணிப்பு குழுவினரும், 5 பறக்கும்படை குழுவும்,150 ஸ்கேனிங் கண்காணிப்பாளர்களும் நியமிக்கப்பட்டு உள்ளனர்.

மேலும் மாணவ, மாணவிகள் எளிதாக தேர்வு மையத்திற்கு சென்று வரும் வகையில் ஏராளமான சிறப்பு பேருந்துகளும் இயக்கப்பட்டுள்ளது. இதேபோல், அண்டை மாவட்டமான விருதுநகர், நெல்லை உள்ளிட்ட மாவட்டங்களிலும் போக்குவரத்து அதிகாரிகளை தொடர்பு கொண்டு சிறப்பு பேருந்துகளை இயக்க தேவையான நடவடிக்கைகள் எடுக்கப்பட்டுள்ளது. இவ்வாறு மாவட்ட ஆட்சியர் தெரிவித்தார்.