காஞ்சிபுரம் ராஜாஜி காய்கறி சந்தையை இடம் மாற்ற வியாபாரிகள் எதிர்ப்பு

காஞ்சிபுரம் தேரடி பகுதியில் அமைந்துள்ளது ராஜாஜி காய்கறி சந்தை. இங்கு காஞ்சிபுரத்தை சுற்றியுள்ள பல்வேறு கிராமங்களில் விளைவிக்கப்படும் காய்கறிகள் அதிகாலை முதல் வரத்தொடங்கி கோயம்பேடு காய்கறி சந்தை மற்றும் பல மாவட்டத்தை சேர்ந்த காய்கறிகள் இங்கு மொத்தமாகவும் சில்லரையாகவும் விற்கப்படுவது வழக்கம்.

இந்நிலையில் நாள்தோறும் ஆயிரக்கணக்கானோர் இங்கு கூடுவதால் நோய் தொற்று பரவல் அதிகரிக்கும் என பெருநகராட்சி வியாபாரிகளிடம் கூறி காய்கறி சந்தையை இடமாற்றம் செய்ய வலியுறுத்தி வந்தனர்.

இக்கருத்தை வியாபாரிகள் ஏற்க மறுத்து ராஜாஜி காய்கறி சந்தையை மூடி தங்களது எதிர்ப்பைத் தெரிவித்து வருகின்றனர். கடந்த காலங்களில் நகரில் வெளிப்புறம் காய்கறி சந்தை அமைக்கப்பட்டதால் பெருமளவில் வியாபாரம் குறைந்து தங்களது வாழ்வாதாரத்தை இழந்து வந்த நிலையில் மீண்டும் இதுபோன்ற நிலையை உருவாக்க அனுமதிக்க மாட்டோம் என வியாபாரிகள் கூறுகின்றனர்.