தேனி :பெண்கள், குழந்தைகளுக்கு எதிரான குற்றங்களை தடுக்க Women Help Desk திட்டம் தொடக்கம்

பெண்கள் குழந்தைகளுக்கு எதிரான குற்றங்களை தடுக்க 'Women Help Desk' திட்டம் தொடங்கப்பட்டது

தேனி மாவட்டத்தில் பெண்கள் மற்றும் குழந்தைகளுக்கு எதிரான குற்றங்களை தடுக்க 'உமன் ஹெல்ப் டெஸ்க்' என்ற திட்டத்தை தேனி மாவட்ட காவல் கண்காணிப்பாளர் பிரவீன் உமேஷ் டோங்கரே தொடங்கி வைத்தார் .

தேனி மாவட்டம், வீரபாண்டி காவலர் சமுதாய மண்டபத்தில் பெண் காவல் ஆய்வாளர்கள், பெண் சார்பு ஆய்வாளர்கள் மற்றும் பெண் காவல் ஆளிநர்கள் ஆகியவர்களுக்கு பெண்கள் மற்றும் குழந்தைகளுக்கு எதிராக நடைபெறும் குற்றங்களை தடுக்க தேனி மாவட்ட காவல்துறை மற்றும் ஏ.ஹைச்.எம். டிரஸ்ட் இணைந்து ''Women Help Desk'' என்ற திட்ட பயிற்சி முகாமை நடத்தினர்.

தேனி மாவட்ட காவல் கண்காணிப்பாளர் டோங்கரே பிரவிண் உமேஷ், திட்டத்தை தொடங்கி வைத்து பேசியதாவது: பெண்கள் மற்றும் குழந்தைகள் சம்மந்தப்பட்ட பிரச்சனைகளுக்கு விரைந்து தீர்வு காண வேண்டும்., பிரச்சினை நடைபெறும் இடத்திற்கு விரைவாக செல்ல வேண்டும். தவறு செய்தவர்களுக்கு விரைவாக தண்டனை கிடைக்கச் செய்ய வேண்டும்.

பெண்கள் மற்றும் குழந்தைகளுக்கு எதிரான குற்றங்களுக்கு எளிதாக தொடர்பு கொள்ளும் வகையில் தேனி மாவட்டத்தில் உள்ள 20 காவல் நிலையங்களில் உதவி மையம் தொடங்கப்பட்டு பயிற்சி பெற்ற பெண் காவலர் ஒருவர் நியமிக்கப்பட்டுள்ளார். பெண்கள் 181, குழந்தைகள் 1098 ஆகிய இலவச தொலைபேசி எண்கள் மூலம் தொடர்பு கொண்டு தங்கள் புகார்களை தெரிவிக்க வேண்டும் என பேசினார். இப்பயிற்சி முகாமில் கூடுதல் எஸ்.பி.க்கள் ராஜேந்திரன், சங்கரன் உட்பட பலர் பங்கேற்றனர்.