முக்காலி போட்டு அமர்ந்து, பொறுமையாக சைக்கிளை திருடி சென்ற ஆசாமி

தஞ்சாவூர் ராஜகோபால்சாமி கோவில் தெருவில், தனியார் மெட்ரிக் பள்ளி அமைந்துள்ளது. இப்பள்ளிக்கு எதிரே மாணவர்கள் இரு சக்கர வாகனம் நிறுத்தும் இடம் உள்ளது. இங்கு நிறுத்தி வைக்கும் சைக்கிள்கள் தொடர்ந்து திருடப்பட்டு வந்துள்ளன.

இந்நிலையில் அங்கு பொருத்தப்பட்டிருந்த கண்காணிப்பு கேமராவை ஆய்வு செய்த போது, வெள்ளை சட்டை, காவி வேட்டி, கையில் முக்காலியுடன் வரும் மர்ம நபர், ஒரு முறை நோட்டமிட்டு பிறகு, மீண்டும் வாசலில் முக்காலி போட்டு சில நிமிடங்கள் அமர்ந்து சாலையில் வேவு பார்த்துள்ளார்.

அப்போது மக்கள் நடமாட்டம் இல்லாத நேரத்தில், சொந்த சைக்கிளை நிறுத்தி வைத்து எடுத்து செல்வது போல் சைக்கிளை திருடி சென்றுள்ளார். இவை அனைத்தும் கண்காணிப்பு கேமராவில் பதிவாகி உள்ளது. இந்த பகுதியில் மட்டும் ஒரே வாரத்தில் 15 சைக்கிள் திருட்டு போய் உள்ளது என்பது குறிப்பிடத்தக்கது. இந்த வீடியோ பதிவுகளின் அடிப்படையில் போலீசார் மர்ம ஆசாமியை தேடி வருகிறார்கள்.