பாம்பன் தூக்கு பாலத்தில் சோதனை ஓட்டம் முடிந்ததும் சென்சார் மீண்டும் பழுது.

பாம்பன் தூக்கு பாலத்தில் சோதனை ஓட்டம் முடிந்ததும் சென்சார் மீண்டும் பழுதானதால் ரயில் பயணிகள் கடுமையாக பாதிக்கப்பட்டனர்.

இராமநாதபுரம் மாவட்டம் இராமேஸ்வரம் தீவு பகுதியையும், மண்டபம் நிலப்பரப்பையும் இணைப்பதற்கு முக்கிய பங்காற்றி வருவது பாம்பன் பாலங்கள் தான். இந்த நிலையில் பாம்பன் தூக்கு பாலத்தில் கடந்த 27ம் தேதி ஏற்பட்ட சென்சார் தொழில்நுட்ப கோளாறு காரணமாக ரயில்கள் இயக்கப்படாமல், அனைத்து ரயில்களும் மண்டபம் ரயில் நிலையத்தில் இருந்து இயக்கப்பட்டு வந்தது. இதையடுத்து பாம்பன் தூக்கு பாலத்தில் ஏற்பட்டுள்ள சென்சார் தொழில்நுட்ப கோளாறுகளை நேற்று ரயில்வே ஊழியர்கள் மற்றும் பொறியாளர்கள் சரி செய்தனர். இதைதொடர்ந்து மாலை பாம்பன் ரயில் பாலத்தில் பயணிகள் இல்லாத ரயிலை பாம்பன் தூக்கு பாலத்தில் சோதனை செய்தனர். மேலும் பாம்பன் ரயில் பாலத்தில் ரயிலை நிறுத்தி வைத்தும் சோதனை செய்தனர். மீண்டும் சென்சர் பிரச்சனை ஏற்படுகிறதா, அல்லது பாம்பன் தூக்கு பாலத்தில் ஏதேனும் அதிர்வுகள் உள்ளதா என்று சோதனை செய்தனர். இந்த சோதனையின்போது பாம்பன் தூக்கு பாலத்தில் சென்சார் பிரச்சனை மற்றும் அதிர்வு இல்லை என்றதால், மீண்டும் ராமேஸ்வரம் வரை ரயில் போக்குவரத்து துவங்கியது. இந்நிலையில் இன்று மீண்டும் சென்சார் தொழில்நுட்ப கோளாறு ஏற்பட்டுள்ளது. இதனை சரிசெய்ய சென்னை ஐஐடி ஊழியர்கள் வரவழைக்கப்பட்டுள்ளனர். தொடர்ந்து பாம்பன் தூக்கு பாலத்தில் சென்சார் கோளாறு ஏற்படுவதால் ரயில் பயணிகள் கடுமையாக பாதிக்கப்பட்டுள்ளனர்.