குண்டும் குழியுமாக உள்ள சாலையை சீரமைக்க பொதுமக்கள் கோரிக்கை
சிறுமலையில் கடமான் குளத்தில் இருந்து வேளாங்கண்ணி வரை செல்லும் குண்டும் குழியுமான சாலையை சீரமைக்க பொதுமக்கள் கோரிக்கை
HIGHLIGHTS
திண்டுக்கல் மாவட்டம் சிறுமலை ஊராட்சி ஒன்றியத்திற்கு உட்பட்ட மாங்குளம் பகுதியில் இருந்து தாள கடை வேளாண் பண்ணை உள்ளிட்ட பகுதிகளுக்கு செல்லக்கூடிய சுமார் எட்டு கிலோ மீட்டர் சாலை, கடந்த 2013 - 14 ஆம் ஆண்டுகளில் போடப்பட்டது. இதிலிருந்து மறுசீரமைப்பு செய்யப்பட்ட அந்தப் பகுதிகளில் மின்சாரம் கொண்டு செல்வதற்காக சாலையின் ஓரத்தில் பள்ளம் தோண்டப்பட்டு சேதமடைந்தது.
கடந்த சில நாட்களாக சிறுமலை மலைபகுதிகளில் அவ்வப்போது கனமழை பெய்து வரும் நிலையில், சேறும் சகதியுமாக சாலை மாறி உள்ளது. இதன் காரணமாக அப்பகுதியில் உள்ள விவசாய நிலங்களில் விளைவிக்கக் கூடிய காய்கறிகள் உள்ளிட்ட பொருள்களை திண்டுக்கல் சந்தை பகுதிகளுக்கு கொண்டு வர முடியாமல் விவசாயிகள் தவித்து வருகின்றனர்.
மேலும் இருசக்கர வாகனங்களில் செல்ல முடியாத நிலையில் தட்டுத்தடுமாறி செல்ல வேண்டிய சூழ்நிலை ஏற்பட்டுள்ளது. மேலும் சரக்கு வாகனங்களில் காய்கறிகளை அதிக பாரம் ஏற்றாமல் குறைந்த பாரத்தில் ஏற்றிக்கொண்டு சாலையில் வருவதற்கு மிகவும் சிரமப்பட்டு கொண்டு வருகின்றனர். விவசாயிகள் ஒன்று சேர்ந்து கயிறு கட்டி சரக்கு வாகனங்களை இழுத்து வரும் அவலநிலை உள்ளது. ஏறத்தாழ எட்டு கிலோ மீட்டர் தூரத்தை கடந்து செல்வதற்கு 3 மணி நேரம் ஆகிறது.
இதனால் உரிய நேரத்தில் சந்தைகளுக்கு விளை பொருட்களை கொண்டு வர முடியாமல் தவிக்கின்றனர். இந்த சாலையை கிராம ஊராட்சி நிதியிலிருந்து அதிக செலவு தொகை செய்து போட முடியாத நிலை உள்ளது. மேலும் வனத்துறையின் கட்டுப்பாட்டில் இந்த பகுதி உள்ளது. எனவே வனத்துறை சார்பில் சேதமடைந்த சாலையை முழுமையாக சீரமைத்து தரமான சாலை அமைத்து தர வேண்டும் என்று பொதுமக்கள் கோரிக்கை விடுத்து உள்ளனர்.
இந்த பகுதியில் உள்ள மக்கள் அவசர தேவைக்காக ஆம்புலன்ஸ் வாகனம் கூட செல்ல முடியாத நிலை உள்ளதால் உடல்நிலை பாதிக்கப்பட்டவர்களை மிகவும் சிரமப்பட்டு எட்டு கிலோமீட்டர் வரை கொண்டு வந்த பிறகுதான் ஆம்புலன்ஸில் ஏற்றி திண்டுக்கல்லில் உள்ள மருத்துவமனைக்கு கொண்டு வர வேண்டிய சூழ்நிலை உள்ளது. விவசாயிகள் மற்றும் பொதுமக்களின் துன்பத்தை போக்கும் வகையில் தார் சாலைக்கு நிதி ஒதுக்கீடு செய்து விரைந்து பணிகளை நடத்த வேண்டும் என்பது பொதுமக்களின் கோரிக்கையாக உள்ளது.