பெரம்பலூர்: மழையால் 16 ஏரிகள் நிரம்பின - உபரி நீர் வெளியேற்றம்

பெரம்பலூர் மாவட்டத்தில், 73 ஏரிகள் பொதுப்பணித்துறை கட்டுப்பாட்டில் உள்ளன. காற்றழுத்த தாழ்வுநிலை காரணமாக மாவட்டத்தில் கடந்த ஒருவாரமாக தொடர்ந்து.மழை பெய்து வருகிறது. மாவட்டத்தில் வேப்பந்தட்டை தாலுகாவில் உள்ள அரும்பாவூர் பெரிய ஏரி, சிறிய ஏரி, வெண்பாவூர், நூத்தாப்பூர், பாண்டகப்பாடி, அரசலூர் ஏரி, பெரம்பலூர் தாலுகாவில் உள்ள மேலப்புலியூர் அய்யலூர், குரும்பலூர், குன்னம் தாலுகாவில் உள்ள கீழப்பெரம்பலூர், வடக்கலூர், வடக்கலூர் அக்ரகாரம், ஒகளூர், கீரனூர், பெருமத்தூர், ஆலத்தூர் தாலுகாவில் உள்ள வரகுபாடி ஆகிய 16 ஏரிகளும் நிரம்பி வழிகின்றன.

நெற்குணம், பேரையூர், வயலூர், கிழுமத்தூர், அகரம்சிகூர், கைப்பெரம்பலூர், லாடபுரம் ஆகிய 9 ஏரிகளில் 81 சதவீதம் முதல், 90 சதவீதம் வரை நீர் நிரம்பி உள்ளன . பெரம்பலூர் சிறியஏரி, வெள்ளந்தாங்கி அம்மன் ஏரி, துறைமங்கலம் பெரியஏரி, வி.களத்தூரில் உள்ள சிறிய மற்றும் பெரிய ஏரிகள் உள்ளிட்ட 54 ஏரிகளில் 71 சதவீதம் முதல், 80 சதவீதம் வரை நீர் நிரம்பி உள்ளன. கைகளத்தூர், எழுமூர், ஆய்குடி, தழுதாழை, வெங்கலம், அன்னமங்கலம் ஆகிய 6 ஏரிகளும், 51 சதவீதம் முதல், 70 சதவீதம் வரை நிரம்பி உள்ளன. பெரம்பலூர் பெரியஏரி , சின்னாறு நீர்த்தேக்க பெரிய ஏரி உள்பட 15 ஏரிகளில், 26 சதவீதம் முதல் 50 சதவீதம் நீர் நிரம்பி உள்ளன.

அரணாரை நீலியம்மன் ஏரி, எசனை உள்பட 23 ஏரிகளில், 25 சதவீதத்திற்கு குறைவாக நீர் நிரம்பி உள்ளது. விசுவக்குடி அணையின் முழு கொள்ள்ளவான 26.74 அடியில், தற்போது 25.78 மில்லியன் கன அடி தண்ணீர் உள்ளது. உபரிநீர் பிரதான மதகுவழியாக திறந்து விடப்படுகிறது. மருதையாற்றின் குறுக்கே, கொட்டரையில் கட்டப்பட்டுள்ள நீர்த்தேக்கத்தின் உயரம், 33.78 அடி ஆகும். இதில், முழு கொள்ளளவான ஏறத்தாழ 212.47 மில்லியன் கனஅடி நீர்தேங்கி உள்ளதால், பிரதான மதகுகள் வழியாக உபரிநீர் தொடர்ந்து வெளியேற்றப்படுகிறது .