பங்களாப்புதூர் அருகே கணவர் இறப்பில் சந்தேகம்: மனைவி புகாரால் பரபரப்பு

ஈரோடு மாவட்டம், டி.என்.பாளையம் அரச மரம் பஸ் ஸ்டாப் சென்னியப்பன் சந்து பகுதியை சேர்ந்த பொன்னுசாமி மகன் சூரியகுமார் (50). லாரி டிரைவர் இவருக்கு கடந்த 20 வருடங்களுக்கு முன்பு திருமணமாகி மனைவி ராஜேஸ்வரி (45), மகள் ஒருவர் உள்ளார்.

இவருக்கு குடிப்பழக்கம் இருப்பதாக கூறப்படும் நிலையில் கடந்த 7 வருடங்களாக இவர்கள் பிரிந்து வாழ்ந்ததாக தெரிகிறது. இந்நிலையில் கடந்த சில நாட்களாக சரிவர உணவு ஏதும் சாப்பிடாமல் அடிக்கடி மது அருந்தி வந்த சூரியகுமார் நேற்று வீட்டில் இறந்து கிடந்து உள்ளார்.

இதனைத்தொடர்ந்து, இறந்து கிடந்த சூரியகுமாரை அவரது உறவினர்கள் கோபி மின் மயானத்திற்கு கொண்டு சென்றுள்ளனர். தகவல் கிடைத்து உறவினர்களுடன் வந்த சூரியகுமார் மனைவி ராஜேஸ்வரி, தனது கணவர் இறப்பில் சந்தேகம் இருப்பதாக கருதி, பங்களாப்புதூர் போலீஸ் நிலையத்திற்கு அருகே ஆம்புலன்ஸில் சூரியகுமார் உடலை கொண்டு புகார் அளிக்க வந்தனர். போலீசார் பேச்சு வார்த்தை நடத்தி சத்தியமங்கலம் அரசு மருத்துவமனைக்கு அனுப்பி வைத்தனர், இச்சம்பவம் குறித்து பங்களாப்புதூர் போலீசார் வழக்கு பதிவு செய்து விசாரணை நடத்தி வருகின்றனர்.