ராமேஸ்வரம் மீனவர்கள் 43 பேரை விடுவிக்க கோரி குடும்பத்தினர் மனு
இலங்கை சிறையில் உள்ள ராமேஸ்வரம் மீனவர்கள் 43 பேரை விடுவிக்க கோரி அவர்களின் குடும்பத்தினர் கண்ணீர் மல்க மனு கொடுத்தனர்.
HIGHLIGHTS
மனு கொடுக்க வந்திருந்த மீனவ குடும்பத்தினர்.
இராமேஸ்வரத்தை சேர்ந்த மீனவர்கள் கடந்த 18ம் தேதி பாரம்பரியமாக மீன்பிடிக்கும் பகுதியில் மீன்பிடித்துக் கொண்டிருந்தபோது அந்தப் பகுதியில் ரோந்து பணியில் ஈடுபட்ட இலங்கை கடற்படையினர் ராமேஸ்வரத்தை சேர்ந்த 43 மீனவர்களையும் 6 விசைப்படகுகளையும் சிறைபிடித்து சென்றனர். சிறை பிடித்துச் சென்ற 43 மீனவர்கள் தற்போது இலங்கை யாழ்ப்பாணம் சிறையில் அடைக்கப்பட்டுள்ளனர். அவர்களை விடுவிக்க கோரி இராமேஸ்வரம் பகுதி மீனவர்கள் வேலைநிறுத்தம், உண்ணாவிரதம் உள்ளிட்ட பல்வேறு கட்ட போராட்டங்களில் ஈடுபட்டனர். மீனவர்களை விடுவித்து தர நடவடிக்கை எடுப்பதாக அதிகாரிகள் வாக்குறுதி அளித்ததை தொடர்ந்து போராட்டங்களை கைவிட்டு கடலுக்கு மீன் பிடிக்கச் சென்றனர். இந்நிலையில் அவர்கள் பிடிபட்டு 20 நாட்களுக்கு மேலாகியும் விடுவிக்கப்படாததால் கைது செய்யப்பட்ட 43 மீனவர்களின் உறவினர்கள் கைக் குழந்தைகளோடு இன்று இராமநாதபுரம் மீன்வளத்துறை துணை இயக்குனர் அலுவலகத்தை முற்றுகையிட்டு மனு அளித்தனர்.
மீனவப் பெண்கள் அழுது புலம்பி மீன்வளத் துறை அலுவலகத்தில் முற்றுகைப் போராட்டம் நடத்தியதால் அங்கு பரபரப்பு ஏற்பட்டது. அதனை தொடர்ந்து மீன்வளத்துறை துணை இயக்குனரை நேரில் சந்தித்து பொங்கல் பண்டிகைக்குள் மீனவர்களையும் அவர்களது படகுகளையும் உடனடியாக விடுவிக்க வேண்டும். இல்லாவிட்டால் குடும்பத்துடன் தற்கொலை செய்து கொள்வதாக மனு அளித்தனர். அதனை பெற்றுக்கொண்ட மீன்வளத்துறை துணை இயக்குனர் மீனவர்களை விடுவிக்க அரசு நடவடிக்கை எடுத்து வருவதாக வாக்குறுதி அளித்தார்.
