இராசிபுரம் : மாவட்ட அளவிலான அரசுப் பள்ளிகளின் நூற்றாண்டு விழா-மாவட்ட ஆட்சியர் ச. உமா தலைமை

நாமக்கல் : நாமக்கல் மாவட்டம், ராசிபுரம் நகராட்சி, அண்ணா சாலை அரசு மேல்நிலைப் பள்ளியில், மாவட்ட அளவிலான அரசுப் பள்ளிகளின் நூற்றாண்டு விழா வியாழக்கிழமை நடைபெற்றது. மாவட்ட ஆட்சியர் ச. உமா தலைமை வகித்தார். மாநிலங்களவை உறுப்பினர் கே.ஆர்.என். ராஜேஸ்குமார், ஈரோடு மக்களவை உறுப்பினர் கே.பி. பிரகாஷ் ஆகியோர் முன்னிலை வகித்தனர்.

நூற்றாண்டு விழா சுடரை ஏற்றினார் அமைச்சர் மதிவேந்தன்

தமிழக ஆதிதிராவிடர் மற்றும் பழங்குடியினர் நலத்துறை அமைச்சர் மா. மதிவேந்தன் பங்கேற்று நூற்றாண்டு விழா சுடரை ஏற்றி வைத்து முன்னாள் ஆசிரியர்கள், முன்னாள் மாணவர்களை கெளரவித்தார்.

அரசுப் பள்ளிகளில் மாணவர் சேர்க்கை அதிகரிப்பு

விழாவில் பேசிய அமைச்சர் மதிவேந்தன், "கல்வியின் சிறப்பான முன்னெடுப்புகளுள் ஒன்றாக அரசுப் பள்ளிகளில் நூற்றாண்டு திருவிழா நடைபெற்று வருகிறது. தற்போது, அரசுப் பள்ளிகளில் மாணவர் சேர்க்கை அதிகரித்துள்ளது" என்று தெரிவித்தார்.

மேலும், "அரசுப் பள்ளிகளில் படித்த மாணவர்கள் பல்வேறு துறைகளில் சிறந்தவர்களாகவும், பெருமை மிக்கவர்களாகவும் திகழ்ந்து கொண்டிருக்கின்றனர்" என்றும் அமைச்சர் மதிவேந்தன் கூறினார்.