புதிய அலுவலகத்துக்கான கட்டடப் பணி : ரூ. 42.49 கோடி மதிப்பிலான 21 திட்டப் பணிகளுக்கு அமைச்சா் ஆா்.ராஜேந்திரன் அடிக்கல் நாட்டல்

சேலத்தில் நடைபெற்ற நிகழ்ச்சியில் பொதுப்பணித் துறையின் சார்பில் புதிதாகக் கட்டப்படவுள்ள ரூ. 42.49 கோடி மதிப்பிலான 21 திட்டப் பணிகளுக்கு சுற்றுலா துறை அமைச்சர் ராஜேந்திரன் வியாழக்கிழமை அடிக்கல் நாட்டினார். இதில், மாவட்ட ஆட்சியர் ரா.பிருந்தாதேவி, மாநகராட்சி மேயர் ஆ.ராமச்சந்திரன் ஆகியோர் கலந்துகொண்டனர்.

பள்ளிக் கல்வித் துறையில் முதலீடு

பள்ளிக் கல்வித் துறை, உயர்கல்வித் துறை, மருத்துவ துறைகளுக்கு அதிக முக்கியத்துவம் அளித்து தமிழக அரசு செயல்பட்டு வருகிறது. குறிப்பாக, பள்ளிக் கல்வித் துறையின் சார்பில் ஆத்தூர், பன்னப்பட்டி, கஞ்சநாயக்கன்பட்டி, மல்லியக்கரை, கொண்டப்பநாயக்கன்பட்டி, குண்டுக்கல், சேசன்சாவடி, ராமநாயக்கன்பாளையம், கம்மாலப்பட்டி, கொண்டலாம்பட்டி, இளம்பிள்ளை, வாழப்பாடி, வீரகனூர் ஆகிய 13 அரசுப் பள்ளிகளுக்கு நபார்டு திட்டத்தின் கீழ் ரூ. 21.66 கோடி மதிப்பீட்டிலான புதிய வகுப்பறைகள், பள்ளி உள்கட்டமைப்பு மேம்பாட்டுப் பணிகள் மேற்கொள்ள அடிக்கல் நாட்டப்பட்டுள்ளன.

சமூக பாதுகாப்பு துறையில் முதலீடு

அதேபோன்று, சமூக பாதுகாப்பு துறையின் சார்பில் சேலம் அரசு கூர்நோக்கு இல்லம், பெத்தநாயக்கன்பாளையத்தில் உள்ள அன்னை சத்யா அம்மையார் அரசு குழந்தைகள் காப்பகம் ஆகியவற்றில் ரூ. 1.60 கோடி மதிப்பீட்டில் உபகரணங்களுடன் கூடிய நவீன சமையலறை உள்ளிட்ட மேம்பாட்டுப் பணிகள் மற்றும் உணவருந்தும் கூடத்துடன் கூடிய சமையலறை கட்டும் பணிகளுக்கும் அடிக்கல் நாட்டப்பட்டுள்ளது.

பொதுப்பணித் துறை ஆய்வு மாளிகையில் முதலீடு

சேலம் பொதுப்பணித் துறை ஆய்வு மாளிகை வளாகத்தில் ரூ. 1 கோடி மதிப்பீட்டில் தரக்கட்டுப்பாடு ஆய்வகக் கட்டடம் கட்டும் பணிக்கும் அடிக்கல் நாட்டப்பட்டுள்ளது.

மருத்துவ மற்றும் மக்கள் நல்வாழ்வுத் துறையில் முதலீடு

மருத்துவம் மற்றும் மக்கள் நல்வாழ்வுத் துறையின் சார்பில் வேம்படிதாளம் அரசு மருத்துவமனையில் ரூ. 3.50 கோடி மதிப்பீட்டில் கூடுதல் கட்டடம் கட்டும் பணிக்கும் அடிக்கல் நாட்டப்பட்டது.

வணிக வரி மற்றும் பதிவுத் துறையில் முதலீடு

வணிக வரி மற்றும் பதிவுத் துறையின் சார்பில் சேலம் ஒருங்கிணைந்த வணிகவரி அலுவலக வளாகத்தில் ரூ. 9.84 கோடி மதிப்பீட்டில் நுண்ணறிவு கோட்டத்துக்கான புதிய கட்டடம் கட்டும் பணிகளுக்கும் அடிக்கல் நாட்டப்பட்டது.

புதிய ஆட்சியர் கிராம அலுவலக கட்டடம்

அஸ்தம்பட்டி உழவர் சந்தை எதிரில் ரூ. 89.50 லட்சம் மதிப்பீட்டில் கட்டப்படவுள்ள சேலம் வடக்கு சட்டப் பேரவைத் தொகுதிக்கான அலுவலக கட்டடத்துடன் கூடிய இ-சேவை மையத்துக்கான அறை, பார்வையாளர்கள் அறை, கணினி அறை உள்ளிட்ட புதிய கட்டடப் பணி உள்பட மொத்தம் ரூ. 42.49 கோடி மதிப்பிலான 21 திட்டப் பணிகளுக்கு அடிக்கல் நாட்டப்பட்டுள்ளது என்றாா்.

பங்கேற்பாளர்கள்

இந்நிகழ்ச்சியில், வணிக வரித் துறையின் இணை ஆணையர் சுதா, சேலம் கோட்டாட்சியர் அ.அபிநயா, பொதுப்பணித் துறையின் செயற்பொறியாளர் தியாகராஜன், முன்னாள் சட்டப் பேரவை உறுப்பினர் எஸ்.ஆர். சிவலிங்கம், அஸ்தம்பட்டி மண்டல குழுத்தலைவர் செ.உமாராணி உள்ளிட்ட தொடர்புடைய அலுவலர்கள், நகர்ப்புற உள்ளாட்சி அமைப்புகளின் பிரதிநிதிகள் உள்ளிட்டோர் கலந்துகொண்டனர்.