பவானி சங்கமேஸ்வரர் கோவிலில் ரூ.2.05 கோடியில் வளர்ச்சிப் பணிகள்

Erode news, Erode news today- பவானி சங்கமேஸ்வரர் கோயில் மற்றும் சுற்றுப்புறப் பகுதிகளில் அடிப்படை வசதிகள் உள்பட ரூ.2.05 கோடி மதிப்பிலான பணிகள் மேற்கொள்ளப்படும் என அறிவிக்கப்பட்டுள்ளது.

தமிழக சட்டசபை கூட்டம் கடந்த மார்ச் மாதம் 29-ம் தேதி முதல் நடைபெற்று வருகிறது. ஒவ்வொரு நாளும் அரசுத்துறை வாரியாக மானியக் கோரிக்கைகள் தாக்கல் செய்யப்பட்டு விவாதிக்கப்பட்டு வந்தது. இந்நிலையில், நேற்று (புதன்கிழமை) சட்டசபையில் இந்து சமய அறநிலையத் துறை மானிய கோரிக்கை விவாதத்திற்கு பதில் அளித்து, அமைச்சர் சேகர்பாபு பல்வேறு அறிவிப்புகளை வெளியிட்டார்.

அதில், பவானி சங்கமேஸ்வரர் கோயிலில் தேர் கொட்டகை ரூ.15 லட்சத்தில் அமைத்தல், கோயில் பணியாளர்களுக்கு ரூ.30 லட்சத்தில் குடியிருப்புகள் சீரமைப்பு, பவானி ஆற்றங்கரையோரத்தில் ரூ.1 கோடியில் அடிப்படை வசதிகள் ஏற்படுத்தப்படுகிறது.மேலும், கோயிலில் உயிரிழந்த யானை வேதநாயகிக்கு ரூ.60 லட்சத்தில் மணி மண்டபம் கட்டப்படும் எனத் தெரிவித்துள்ளார். இதற்கு, பொதுமக்கள், பக்தர்கள் நன்றி தெரிவித்துள்ளனர். ஆக மொத்தம் ரூ 2.05 கோடி மதிப்பில் திருக்கோயில் நிதி மூலம் பணிகள் மேற்கொள்ள சட்டமன்றத்தில் அறிவிப்பு வெளியிடப்பட்டுள்ளது.