குமாரபாளையத்தில் காளியம்மன் தேரோட்டம்

காளியம்மன் கோவிலில் தேரோட்ட நிகழ்ச்சி

குமாரபாளையம்: குமாரபாளையத்தில் நூற்றாண்டு பழமை வாய்ந்த காளியம்மன் கோவில் பண்டிகையையொட்டி அம்மன் திருக்கல்யாணம், தேரோட்டம், வண்டி வேடிக்கை ஆகிய நிகழ்ச்சிகள் கோலாகலமாக நடைபெற்றன. ஆயிரக்கணக்கான பக்தர்கள் திரண்டு இந்த விழாக்களில் பங்கேற்று அருளாசி பெற்றனர்.

கோவில் விழாவை முன்னிட்டு நேற்று முன்தினம் மகா குண்டம் நிகழ்ச்சி வெகு சிறப்பாக நடைபெற்றது. நேற்று காளியம்மன் கோவில் வளாகத்தில் துவங்கிய தேரோட்டம் ராஜ வீதி, சேலம் சாலை வழியாக வந்து தம்மண்ணன் வீதியில் மதியம் 2:00 மணிக்கு தற்காலிகமாக நிறுத்தப்பட்டது. இதில் அலங்கரிக்கப்பட்ட அம்மனின் தேரை பக்தர்கள் பக்தி பரவசத்துடன் இழுத்து சென்றனர். கோவில் முன்பு பேரிகை, நாதஸ்வரம், தாரை முழங்க, பெண்கள் குங்குமம், மஞ்சள் தூவி வழிபட்டனர்.

மீண்டும் மாலை 4:00 மணிக்கு துவங்கிய தேரோட்டம் அக்ரஹாரம் வழியாக சென்று இரவு 7:00 மணியளவில் நிறுத்தப்பட்டது. இந்த நிகழ்ச்சியில் ஊர் முக்கியப் பிரமுகர்கள், பல்வேறு சமூகத்தைச் சேர்ந்த மக்கள் கலந்து கொண்டனர். அம்மனுக்கு பால், பழம், தேங்காய் முதலிய காணிக்கைகளும் செலுத்தப்பட்டன.

இரண்டாம் நாள் தேரோட்டம் இங்கிருந்து புறப்பட்டு, கோவில் வளாகத்தில் இன்று தேர் நிலை சேர உள்ளது. இன்று இரவு வாண வேடிக்கை, நாளை ஊஞ்சல் விழா, மஞ்சள் நீர் திருவீதி உலா நடைபெறவுள்ளது. பொதுமக்களுக்கு அன்னதானமும் வழங்கப்பட உள்ளதாக கோவில் நிர்வாகம் தெரிவித்துள்ளது.

இவ்விழாவிற்கான ஏற்பாடுகளை கோவில் அறங்காவலர்கள் மற்றும் ஊர் பொதுமக்கள் இணைந்து செய்திருந்தனர். காளியம்மன் கோவில் விழா ஒவ்வொரு ஆண்டும் பாரம்பரிய முறைப்படி கொண்டாடப்பட்டு வருகிறது.