பட்டப்பகலில் பெண்ணை கட்டிப்போட்டு நகை, பணம் கொள்ளை - 4 பேர் கைது

திண்டுக்கல் செட்டிநாயக்கன்பட்டி இ.பி.காலனி பகுதியில் குடியிருப்பவர் துரை/ இவர் போக்குவரத்துதுறை அலுவலர் ஆவார். இரு தினங்களுக்கு முன்பு, காலை 10 மணிக்கு வழக்கம்போல் துரை வேலைக்கு சென்று விட்டார். அவருடைய மனைவி சுஜாதா (55) வீட்டில் தனியாக இருந்தார்.

வீட்டினை நோட்டமிட்ட 4 பேர்கொண்ட மர்ம கும்பல், வீட்டிற்குள் புகுந்து சுஜாதாவை கட்டிப்போட்டு அவரிடம் இருந்து பீரோ சாவியை பறித்து பீரோவில் இருந்த 7 பவுன் தங்க நகைகள், ரூ.50 ஆயிரம் பணம் மற்றும் செல்போன் ஆகியவற்றை பறித்து சென்றனர். இதுகுறித்து தாடிக்கொம்பு காவல்துறையினர் வழக்குப்பதிவு செய்தனர்.

இந்நிலையில் எஸ்பி சீனிவசன் உத்தரவின் பேரில், தனிப்படையினர் குற்றச்சம்பவத்தில் ஈடுபட்ட திண்டுக்கல் பொன்னகரத்தை சேர்ந்த ஆசைத்தம்பி ( 36), பர்மா காலனியை சேர்ந்த சுரேஷ் (32), கரூரை சேர்ந்த மதன்குமார்(25), திருச்சியை சேர்ந்த சிவா(24) ஆகிய 4 பேரை 24 மணி நேரத்தில் கைது செய்து அவர்களிடமிருந்து 7 சவரன் நகைகள் மற்றும் பணம் ரூ.50,000 ஆகியவற்றை பறிமுதல் செய்து நீதிமன்றத்தில் ஆஜர்படுத்தி சிறையில் அடைத்தனர்.