கழுதைப்பால் 600 ரூபாய்க்கு! ஆத்தூரில் அதிரடி விற்பனை

சேலம் மாவட்டம் ஆத்துாரை சேர்ந்த முத்து, தனபால், ஆறுமுகம் ஆகியோர் ஊர் ஊராக சென்று கழுதைப்பால் விற்பனையில் ஈடுபட்டு வருகின்றனர். இவர்கள் அந்தியூருக்கு 12 கழுதைகளுடன் நேற்று வந்தனர். அங்கு 100 மில்லி கழுதைப்பாலை 1,200 ரூபாய்க்கும், 50 மில்லி பாலை 600 ரூபாய்க்கும் விற்பனை செய்தனர். மேலும் ஒரு சங்கடையில் குழந்தைகளுக்கு ஊற்றி தர 100 ரூபாய் கட்டணம் பெற்றனர். கழுதைப்பால் குடித்தால் குழந்தைகளுக்கு சளி, மஞ்சள் காமாலை, ரத்த சோகை, ஜீரண சக்தி, தோல் சம்பந்தமான வியாதிகள் குணமாவதாக அவர்கள் கூறினர்.

பாரம்பரிய மருத்துவ முறைகளில் கழுதைப்பால் ஒரு முக்கிய பொருளாக கருதப்படுகிறது. எனினும் இதன் மருத்துவ பலன்கள் குறித்த அறிவியல் பூர்வமான ஆய்வுகள் குறைவாகவே உள்ளன. மேலும் விற்பனையாளர்கள் வசூலிக்கும் விலை மிகவும் அதிகமாக உள்ளதால், இது ஏழை, எளிய மக்களுக்கு எட்டாக்கனியாக உள்ளது. இந்நிலையில் கழுதைப்பால் விற்பனை மற்றும் பயன்பாடு குறித்து சுகாதாரத்துறை அதிகாரிகள் கண்காணிப்பு மேற்கொள்ள வேண்டியது அவசியமாகிறது.