விமானத்தில் பறந்த டிடிவி தினகரனின் வேட்புமனு

Theni Constituencey Application

அமமுக நிர்வாகிகள் டி.டி.வி., தினகரன் போட்டியிட தேனி கலெக்டர் அலுவலகத்தில் வேட்புமனுவை வாங்கி விமானம் மூலம் சென்னைக்கு அனுப்பி வைத்தனர்.

பா.ஜ.க., கூட்டணியில் அ.ம.மு.க., சார்பில் குக்கர் சின்னத்தில் டி.டி.வி., தினகரன் தேனி லோக்சபா தொகுதியில் போட்டியிடுகிறார். இதற்காக அக்கட்சி வடக்கு மாவட்ட செயலாளர் காசிமாயன், தெற்கு மாவட்ட செயலாளர் முத்துச்சாமி, அமைப்பு செயலாளர் கதிர்காமு, ஸ்டார் ரபீக், மாநில இளைஞரணி இணைச் செயலாளர் மற்றும் சின்னமனுார் நகர செயலாளர் லோகநாதன் உட்பட கட்சி முக்கிய பிரமுகர்கள் தேனி கலெக்டர் அலுவலகம் வந்தனர். காலை 10.05 மணிக்கு அவர்கள் வேட்புமனுவை வாங்கினர்.

பின்னர் கார் மூலம் மனுவை மதுரை விமான நிலையத்திற்கு அனுப்பி வைத்தனர். விமானத்தில் இருந்து 1.05 மணிக்கு சென்னைக்கு மனு அனுப்பி வைக்கப்பட்டது. சென்னையில் உள்ள தினகரனிடம் ஒப்படைக்கப்பட்டது. வரும் 24ம் தேதி பவுர்ணமி அன்று தினகரன் தேனி மாவட்டத்திற்கு வருகிறார். முதலில் டி.கல்லுப்பட்டி பட்டாளம்மன் கோயிலில் சாமி கும்பிட்ட பின்னர் ஊர்வலமாக தேனி வருகிறார். அன்று பிற்பகலுக்குள் அவர் தேனி கலெக்டர் அலுவலகத்தில் மனுதாக்கல் செய்கிறார்.

தேனியில் அவருக்கு பங்களா தயாராக உள்ளது. தேனி மாவட்டத்தில் உள்ள வி.ஐ.பி.,க்களை முதலில் சந்தித்து ஆதரவு கோருகிறார். மூன்று நாட்கள் தேனியில் முகாமிட்டு தேர்தல் பணிகளை கவனிக்க உள்ளார். அதன் பின்னர் கட்சியினர் வீடு, வீடாக ஓட்டு சேகரிக்கும் பணியில் ஈடுபட உள்ளனர்.