மரவள்ளிக்கிழங்கு விலை வீழ்ச்சி, ரூ. 8 ஆயிரம் விலை நியமனம் வேண்டும் என கோரிக்கை!

மரவள்ளிக்கிழங்கின் விலை வீழ்ச்சியை கட்டுப்படுத்த டன்னுக்கு ரூ.8,000 என நிர்ணயம் செய்ய வேண்டும் என தமிழ்நாடு குறு, சிறு விவசாயிகள் சங்க மாநிலத் தலைவர் கே.ஆர்.சுதந்திரராசு முதல்வருக்கு கோரிக்கை விடுத்துள்ளார். ஈரோடு, நாமக்கல், சேலம், கள்ளக்குறிச்சி மாவட்டங்களில் மானாவாரி மற்றும் நீர்த்தெளிப்பு முறையில் பெருமளவில் மரவள்ளிக்கிழங்கு சாகுபடி செய்யப்படுகிறது.

தற்போது ஒரு ஏக்கரில் 10 முதல் 12 டன் வரை மகசூல் கிடைக்கும் நிலையில், சாகுபடி செலவு ஏக்கருக்கு ரூ.70,000 முதல் ரூ.80,000 வரை ஆகிறது. ஆனால் சந்தையில் ஒரு டன் கிழங்கு ரூ.5,000 முதல் ரூ.5,700 வரை மட்டுமே விற்பனையாவதால், விவசாயிகள் ஏக்கருக்கு ரூ.25,000 முதல் ரூ.30,000 வரை இழப்பை சந்தித்து வருகின்றனர்.

இந்நிலையை சரிசெய்ய நான்கு மாவட்ட ஆட்சியர்களும் ஒருங்கிணைந்து நடவடிக்கை எடுக்க வேண்டும் என்றும், விவசாயிகளின் நலனைக் கருத்தில் கொண்டு குறைந்தபட்சம் டன்னுக்கு ரூ.8,000 என விலை நிர்ணயம் செய்ய வேண்டும் என்றும் கோரிக்கை விடுக்கப்பட்டுள்ளது. மேலும் நீண்டகால தீர்வாக மரவள்ளிக்கிழங்கு விலை நிலைப்படுத்துதல் மற்றும் ஏற்றுமதியை ஊக்குவிப்பதற்காக தனி வாரியம் அமைக்க வேண்டும் என்றும் வலியுறுத்தப்பட்டுள்ளது.

டிசம்பர் முதல் மார்ச் வரை அறுவடை காலமாக இருப்பதால், இக்காலகட்டத்தில் விலை வீழ்ச்சியை தடுக்க உடனடி நடவடிக்கை தேவை என விவசாய சங்கங்கள் சுட்டிக்காட்டியுள்ளன. விலை நிர்ணயம் செய்யப்படாவிட்டால் விவசாயிகள் கடன் சுமையில் சிக்கி, அடுத்த பருவத்தில் சாகுபடியை கைவிட நேரிடும் என்றும் எச்சரிக்கை விடுக்கப்பட்டுள்ளது.