இராமேஸ்வரம் மீனவர்கள் 20 பேரை விடுதலை செய்தது இலங்கை கடற்படை

இலங்கை கடற்படை விடுவித்த 20 மீனவர்கள் இராமேஸ்வரம் வந்து சேர்ந்தனர் உறவினர்கள் சக மீனவர்கள் வரவேற்றனர். விடுதலை செய்ய உதவிய மத்திய மாநில அரசுகளுக்கு நன்றி தெரிவித்தனர்.

இராமேஸ்வரத்திலிருந்து நேற்று முன்தினம் மீன்பிடிக்க சென்ற இரண்டு படகுகளையும் அதிலிருந்த 20 மீனவர்களையும் எல்லை தாண்டி வந்ததாக கூறி இலங்கை கடற்படையினர் சிறை பிடித்து அவர்களை இரணைதீவு பகுதியில் தனிமை பிடித்து வைத்தனர். இந்நிலையில் மத்திய, மாநில அரசின் அழுத்தம் காரணமாக சிறைபிடிக்கப்பட்ட இராமேஸ்வரம் மீனவர்கள் 20 பேரையும் இன்று பிற்பகல் ஒரு மணியளவில் இலங்கை கடற்படையினர் படகுடன் விடுவித்தனர். விடுவிக்கப்பட்ட மீனவர்கள் 20 பேரும் மாலை 6 மணியளவில் இராமேஸ்வரம் துறைமுகத்திற்கு வந்து சேர்ந்தனர். வந்து சேர்ந்த மீனவர்கள் 20 பேரையும் சக மீனவர்களும், மீனவர்களின் உறவினர்களும் வரவேற்றனர். இதனையடுத்து விடுவிக்கப்பட்ட மீனவர்கள் தெரிவிக்கும்போது பாரம்பரிய இடத்தில் மின் பிடித்ததாகவும், இலங்கை கடற்படை தங்களை கைது செய்து இரணைதீவு பகுதியில் வைத்திருந்ததாகவும் இன்று பிற்பகல் அனைவரையும் விடுவிப்பதாக தெரிவித்து படகுடன் தங்களை விடுவித்ததாக தெரிவித்தனர். சிறை பிடிக்கப்பட்ட நிலையில் தங்களுக்கு தேவையான அனைத்து உதவிகளையும் இந்திய துணைத் தூதரக அதிகாரிகள் செய்ததாகவும் மேலும் விடுவிப்பதற்காக நடவடிக்கை எடுக்க மத்திய மாநில அரசுகளுக்கும் இலங்கை அரசுக்கும் தங்களின் நன்றியை தெரிவித்துக் கொள்வதாகவும் தெரிவித்தார்.