பண்ணைக்குட்டையில் மீன் திருட்டு

பண்ணைக்குட்டையில் மீன் திருட்டு - குமாரபாளையம் அருகே பண்ணைக்குட்டையில் மீன் திருடப்பட்டது.

குமாரபாளையம் அருகே தட்டான்குட்டை ஊராட்சி, வேலாங்காடு பகுதியில், இளைஞர்கள் சிலர் ஒன்று சேர்ந்து, பண்ணைகுட்டை அமைத்தனர். இதில் 20 ஆயிரம் ரூபாய் செலவு செய்து மீன் குஞ்சுகள் விட்டு வளர்த்து வந்தனர். இந்த குட்டையில் ஏரியிலிருந்து வெளியேறும் நீர், மழை நீர் ஆகியவை சேமித்தால், இதனை சுற்றியுள்ள பல நூறு ஏக்கர் விவசாய நிலங்களில் வாய்க்கால் நீர் வராத காலத்தில் கூட, நிலத்தடி நீர் மூலம் விவசாயம் செய்ய இயலும் என்ற நோக்கத்தில் இந்த பண்ணைக்குட்டை அமைக்கப்பட்டது. இதில் வளர்க்கப்படும் மீன்கள் விற்பனை மூலம்,ஊருக்கு தேவையான முக்கியமான தேவைகளை பூர்த்தி செய்து கொள்ளவும் முடிவு செய்யப்பட்டது. இதற்கு ஊராட்சி நிர்வாகம் மற்றும் மாவட்ட நிர்வாகத்திடம் கூட அனுமதி கேட்டு பராமரித்து வந்தனர். இந்நிலையில் குட்டையில் உள்ள தாமரை மலர்கள் அனைத்தும் அகற்றப்பட்டு, மீன்கள் சுமார் 200 கிலோவிற்கும் மேலாக திருடியுள்ளனர்.

இது குறித்து விவசாயி விஸ்வநாதன் கூறியதாவது:

கூலி வேலைக்கு செல்லும் இளைஞர்கள் நாங்கள் சிலர் ஒன்று சேர்ந்து ஊர் நன்மைக்காக இந்த பண்ணைக்குட்டை அமைத்தோம். இதில் வளர்க்கப்பட்ட மீன்களை மர்ம நபர்கள் 200 கிலோவிற்கும் மேலாக திருடியுள்ளனர். இது குறித்து போலீசில் புகார் மனு கொடுத்துள்ளோம். இதி தொடர்புடைய நபர்கள் மீது நடவடிக்கை எடுக்க வேண்டும்.

இவ்வாறு அவர் கூறினார்.