விஜயகாந்த்துக்கு அனைத்து கட்சியினர் மவுன ஊர்வலம், கண்ணீர் அஞ்சலி

All Political Parties Tribute To Vijaykanth

தமிழக மக்களால் கருப்பு எம்ஜிஆர், கேப்டன், என்று அன்புடன் அழைக்கப்பட்ட நடிகரும் தேமுதிக தலைவருமான விஜயகாந்த் உடல் நலமில்லாமல் காலமானார். அவரது மறைவிற்கு லட்சக்கணக்கான ரசிகர்கள் தொண்டர்கள் என வரிசைகட்டி வந்து அஞ்சலி செலுத்தினர். சென்னை போக்குவரத்தே ஸ்தம்பித்தது. பின்னர் அரசு மரியாதையுடன் அவரது நல்லடக்கமானது கோயம்பேடு தேமுதிக தலைமை அலுவலக வளாகத்தில் நடந்தது. பின்னர் தேமுதிக பொதுச்செயலாளரும் அவரது மனைவியுமான பிரேமலதா அரசுக்கு அவருக்கு பொது இடத்தில் நினைவுமண்டபம் மற்றும் சிலை வைக்கவேண்டும் என வலியுறுத்தியுள்ளார். மேலும் அவரது நினைவிடத்தில் பொதுமக்கள் அஞ்சலி செலுத்தலாம் எனவும் அவர் தெரிவித்துள்ளார். குமாரபாளையத்தில் விஜயகாந்த்க்கு அனைத்து கட்சியினர் மவுன ஊர்வலம் வந்து கண்ணீர் அஞ்சலி செலுத்தினர்.

திரைப்பட நடிகரும், தேசிய முற்போக்கு திராவிட கழகம் கட்சியின் நிறுவனருமான கேப்டன் என அழைக்கப்படும் விஜயகாந்த், உடல்நலமில்லாமல் சென்னை தனியார் மருத்துவமனையில் உயிரிழந்தார். விஜயகாந்த் மறைவிற்குஅனைத்து கட்சியினர் சார்பில் ராஜம் தியேட்டர் முன்பிருந்து தே.மு.தி.க. மாவட்ட பொருளர் மகாலிங்கம், ஒன்றிய நிர்வாகி பாலு, நகர செயலர் ராஜ், முன்னாள் ம.தி.மு.க. நகர செயலர் விஸ்வநாதன் தலைமையில் துவங்கிய மவுன ஊர்வலம், சேலம் சாலை வழியாக பள்ளிபாளையம் பிரிவு சாலையில் நிறைவு பெற்றது. அங்கு வைக்கப்பட்டிருந்த விஜயகாந்த் திருவுருவப்படத்திற்கு மலர்மாலைகள் அணிவிக்கப்பட்டு, மலரஞ்சலி செலுத்தப்பட்டது. இதில் பங்கேற்ற அனைத்து கட்சி நிர்வாகிகள் விஜயகாந்த் செய்த சாதனைகள் குறித்தும், பொதுமக்களுக்கு, கலைஞர்களுக்கு செய்த உதவிகள் குறித்தும் நினைவு கூர்ந்தனர்.

தி.மு.க. அன்பழகன், அன்பரசு, அ.தி.மு.க. திருநாவுக்கரசு, ஒ.பி.எஸ். அணி அ.தி.மு.க. சீனிவாசன், லோகநாதன், காங்கிரஸ் ஜானகிராமன், சிவராஜ், தங்கராஜ், மக்கள் நீதி மய்யம் சித்ரா, மல்லிகா, சி.பி.எம் சரவணன், சி.பி.ஐ. கணேஷ்குமார், தி.க. சரவணன், நில முகவர் சங்க நிர்வாகி பாண்டியன், தளபதி லயன்ஸ் சங்க தலைவர் சண்முகசுந்தரம், விடியல் பிரகாஷ், பஞ்சாலை சண்முகம் உள்பட பலர் பங்கேற்றனர்.