அம்மாபேட்டை அருகே தலைமை காவலரை தாக்கிய போதை ஆசாமி கைது

ஈரோடு மாவட்டம், அம்மாபேட்டை அருகே உள்ள நெரிஞ்சிப்பேட்டையை சேர்ந்தவர் நாகராஜ் (வயது 35). லாரி டிரைவர். இவர் நேற்று மாலை அம்மாபேட்டை-மேட்டூர் ரோட்டில் உள்ள ஒரு தனியார் இரு சக்கர வாகன ஷோரூமில் தனது மோட்டார் சைக்கிளுக்கு என்ஜின் ஆயில் இலவசமாக மாற்றி தர வேண்டும் என கூறி மது போதையில் தகராறில் ஈடுபட்டுள்ளனர்.

இதுகுறித்து தகவலறிந்து வந்த அம்மாபேட்டை போலீசார் நாகராஜை வீட்டிற்கு செல்லுமாறு அறிவுறுத்தினார். ஆனால், அதனை மறுத்த நாகராஜ் போலீசாரிடம் தகராறில் ஈடுபட்டார்.

தொடர்ந்து நாகராஜ் அம்மாபேட்டை காவல் நிலைய தலைமை காவலர் முருகனின் சட்டையை பிடித்து தாக்கி அவர் வைத்திருந்த பேனாவால் குத்தினார். மேலும் அவரின் கை விரலை கடித்து கொலை மிரட்டல் விடுத்ததாக கூறப்படுகிறது.

இதனையடுத்து, அருகில் இருந்தவர்கள் தலைமை காவலரை மீட்டு மருத்துவமனைக்கு அனுப்பி வைத்தனர். பின்னர், தலைமை காவலர் அளித்த புகாரில் பேரில் போலீசார் நாகராஜை கைது செய்து, நீதிமன்றத்தில் ஆஜர்படுத்தி சிறையில் அடைத்தனர்.