நாமக்கல்லில் முட்டை விலை தொடர் சரிவு, 2 நாட்களில் 40 பைசா குறைந்தது * ஒரு முட்டை விலை ரூ. 4.65

நாமக்கல்லில் முட்டை விலை தொடர் சரிவு 2 நாட்களில் 40 பைசா குறைந்தது -  ஒரு முட்டை விலை ரூ. 4.65

நாமக்கல்,

நாமக்கல் மண்டலத்தில், முட்டை தொடர்ந்து சரிவடைந்து வருகிறது. 2 நாட்களில் ஒரு முட்டைக்கு 40 பைசா குறைந்ததால் பண்ணையாளர்கள் அதிர்ச்சி அடைந்துள்ளனர்.

நாமக்கல், சேலம், ஈரோடு, பெருந்துறை, கோவை உள்ளிட்ட நாமக்கல் மண்டலத்தில் ஆயிரத்துக்கும் மேற்பட்ட கோழிப்பண்ணைகள் உள்ளன. இங்கு சுமார் 6 கோடி முட்டைக் கோழிகள் வளர்க்கப்படுகின்றன. தினசரி சுமார் 5 கோடி முட்டைகள் உற்பத்தி செய்யப்படுகிறது. தமிழக அரசின் சத்துணவு திட்டத்திற்கும், வெளிநாட்டிற்கு ஏற்றுமதிக்கும் போக, மீதமுள்ள முட்டைகள், கேரளா உள்ளிட்ட வெளி மாநிலங்களுக்கும், தமிழகத்தின் பல்வேறு மாவட்டங்களுக்கும் விற்பனைக்காக தினசரி லாரிகளில் அனுப்பி வைக்கப்படுகின்றன.

தேசிய முட்டை ஒருங்கிணைப்புக்குழு (என்இசிசி), தினசரி பண்ணைகளில் முட்டை விற்பனை விலையை அறிவித்து வருகிறது. அதை பண்ணையாளர்கள் கடைபிடித்து வருகின்றனர். கடந்த மாதம் வரை முட்டை ஒரு முட்டையின் விலை ரூ. 5.05 ஆக இருந்தது. கடந்த 2ம் தேதி 20 பைசா குறைந்து ரூ. 4.85 ஆனது. இன்று மாலை என்இசிசி மண்டல தலைவர் சிங்கரஜ் தலைமையில் நடைபெற்ற கூட்டத்தில், ரூ. 4.85 ஆக இருந்த முட்டை விலை மேலும் 20 பைசா சரிவடைந்து, ஒரு முட்டையின் பண்ணைக்கொள்முதல் விலை ரூ. 4.65 ஆக நிர்ணயிக்கப்பட்டது. 2 நாட்களில் ஒரு முட்டைக்கு 40 பைசா சரிவடைந்ததால் பண்ணையாளர்கள் கடும் அதிர்ச்சி அடைந்துள்ளனர்.

முக்கிய நகரங்களில் ஒரு முட்டையின் விலை (பைசாவில்) : சென்னை 540, ஹைதராபாத் 460, விஜயவாடா 500, பர்வாலா 415, ஹோஸ்பெட் 465, மைசூர் 517, மும்பை 525, பெங்களூரு 515, கொல்கத்தா 520, டில்லி 450 என விலை நிர்ணயம் செய்யப்பட்டுள்ளது.

கோழிவிலை: பிராய்லர் கறிக்கோழி உயிருடன் ஒருகிலோ ரூ. 90 ஆக பிசிசி அறிவித்துள்ளது. முட்டைக்கோழி விலை ஒரு கிலோ ரூ. 77 ஆக சிகா அறிவித்துள்ளது.