ஈரோட்டில் இ-பாஸ் நடைமுறைப்படுத்த கோரி வழக்கு..தேர்தல் ஆணையம் பதிலளிக்க ஐகோர்ட் உத்தரவு!
ஈரோடு : ஈரோடு கிழக்கு சட்டமன்ற தொகுதி எம்.எல்.ஏ.-ஈ.வி.கே.எஸ். இளங்கோவன் காலமானதை அடுத்து, அந்த தொகுதிக்கு பிப்ரவரி 5-ந்தேதி இடைத்தேர்தல் அறிவிக்கப்பட்டுள்ளது.
கொங்குதேச மறுமலர்ச்சி மக்கள் கட்சியின் மனு
தொகுதியில் வாக்காளர்களை கொட்டகைகளில் அடைத்து வைப்பதை தடுக்க தேர்தல் ஆணையத்துக்கு உத்தரவிடக் கோரி கொங்குதேச மறுமலர்ச்சி மக்கள் கட்சியைச் சேர்ந்த கே.பி.எம்.ராஜா என்பவர் சென்னை ஐகோர்ட்டில் வழக்கு தாக்கல் செய்துள்ளார்.
2023-ம் ஆண்டு இடைத்தேர்தலில் நடந்தவை
இந்த தேர்தலில் போட்டியிட்ட ஆளும் கூட்டணி கட்சி வேட்பாளரை வெற்றிபெறச் செய்யவும், மற்ற வேட்பாளர்கள் வாக்காளர்களை அணுகுவதை தடுக்கவும் ஒவ்வொரு வார்டிலும் கொட்டகைகளை அமைத்து, அதில் வாக்காளர்களை தங்க வைக்கப்பட்டனர். கொட்டகைகளில் தங்க வைக்கப்பட்ட வாக்காளர்களுக்கு உணவு உள்ளிட்டவை வழங்கப்பட்டது. ஓட்டுக்குக்கு பணம் வழங்கப்பட்டது.
தற்போதைய தேர்தலில் மீண்டும் கொட்டகை பாணி பின்பற்றக்கூடும்
தற்போது நடக்க உள்ள தேர்தலில் கொட்டகை பாணி பின்பற்றக் கூடும் என்று கே.பி.எம்.ராஜா தனது மனுவில் தெரிவித்துள்ளார். இதனை தடுக்க, தொகுதிக்கு வரும் வெளியாட்களுக்கும், வெளியூர் செல்லும் தொகுதி வாக்காளர்களுக்கும் இ-பாஸ் நடைமுறையை அமல்படுத்த வேண்டும். தேர்தல் முறைகேடுகள் குறித்து புகார் அளிக்க ஆன்லைன் வசதியை ஏற்படுத்த வேண்டும் என்றும் அவர் கோரிக்கை வைத்துள்ளார்.
ஐகோர்ட்டு கேள்வி
இந்த வழக்கை விசாரித்த நீதிபதிகள் ஆர்.சுப்பிரமணியன், சி.குமரப்பன் ஆகியோர், "மக்கள் ஏன் கொட்டகைக்கு செல்ல வேண்டும்? யார் தான் சலுகைகள் வழங்கவில்லை?" என கேள்வி எழுப்பினார்.இறுதியாக, மனுவுக்கு தேர்தல் ஆணையம் பதிலளிக்கும்படி ஐகோர்ட் உத்தரவிட்டு, விசாரணையை தள்ளிவைத்தது.
