அறிவியல் மேதை அப்துல்கலாம் வீட்டிற்கு வந்தது மகிழ்ச்சி என கனிமொழி எம்பி ராமேஸ்வரத்தில் கூறினார்.
ராமநாதபுரம் மாவட்டத்தில் தேர்தல் பிரச்சாரப் பயணம் மேற்கொண்டுள்ள திமுக மகளிர் அணி செயலாளரும் எம்பியுமான கனிமொழி இன்று ராமேஸ்வரம் தீவுப்பகுதியில் பிரச்சாரபயணம் மேற்கொண்டார். காலையில் தனுஷ்கோடி சென்று அங்குள்ள மீனவர்களுடன் கலந்துரையாடிய கனிமொழி, அதன் பின்னர் மறைந்த முன்னாள் ஜனாதிபதியும், விஞ்ஞானியுமான ஏபிஜே.அப்துல்கலாம் வீட்டிற்கு வருகை தந்தார். அவரை கலாமின் அண்ணன் மகன் ஜெயினுலாபுதீன் தலைமையில் கலாம் குடும்பத்தினர் பொன்னாடை அணிவித்து வரவேற்றனர்.
கலாமின் அண்ணன் முகமது முத்துமீரா மரைக்காயரிடம் ஆசி பெற்ற கனிமொழிக்கு கலாமின் அண்ணன் மகள் நஜீமா மரைக்காயர், தான் எழுதிய அப்துல்கலாம் நினைவுகளுக்கு மரணமில்லை என்ற புத்தகத்தை நினைவுப்பரிசாக வழங்கினார். கலாமின் அண்ணன் வழி பேரன் ஷேக்சலீம் கலாமின் நினைவுகளை கனிமொழியோடு பகிர்ந்து கொண்டார். தொடர்ந்து, இந்தியாவின் மாபெரும் அறிவியல் மேதை அப்துல்கலாம் வீட்டிற்கு வந்தது மகிழ்ச்சி என கனிமொழி எம்பி கூறினார். கனிமொழியுடன் மாவட்ட செயலாளர் காதர்பாட்சா , முன்னாள் எம்பி. பவானி ராஜேந்திரன், முன்னாள் நகரசெயலாளர் ஜான்பாய், ராமநாதபுரம் எம்பி நவாஷ்கனி உட்பட ஏராளமானோர் கலாம் இல்லத்திற்கு வருகை தந்தனர்.