உங்களைத் தேடி உங்கள் ஊரில்" திட்டம்,கலெக்டர் உமா நேரடி ஆய்வு

உங்களைத் தேடி உங்கள் ஊரில்" திட்டம்: மல்லசமுத்திரத்தில் மக்கள் நலத்திட்டங்கள் ஆய்வு - கலெக்டர் உமா நேரடி ஆய்வு

மல்லசமுத்திரம் ஒன்றியத்தில் "உங்களைத் தேடி உங்கள் ஊரில்" திட்டத்தின் கீழ் நேற்று சிறப்பு முகாம் நடைபெற்றது. இந்த முகாமில் மாவட்ட ஆட்சியர் உமா நேரடியாக கலந்து கொண்டு பல்வேறு துறைகளின் செயல்பாடுகளை ஆய்வு செய்தார்.

கல்வித்துறை சார்பில் மாமுண்டி மற்றும் பள்ளக்குழி அக்ரஹாரம் ஊராட்சி ஒன்றிய நடுநிலைப்பள்ளிகளுக்கு நேரடியாக சென்ற கலெக்டர், அங்கு மாணவர்களுக்கு வழங்கப்படும் மதிய உணவின் தரம் குறித்து ஆய்வு மேற்கொண்டார். மேலும் பள்ளிகளின் அடிப்படை வசதிகள் குறித்தும் கேட்டறிந்தார்.

மாமுண்டி பஞ்சாயத்தில் பட்டு வளர்ச்சித்துறை மூலம் வழங்கப்படும் மானியத் திட்டங்களின் பயன்பாடு குறித்து ஆய்வு செய்தார். குறிப்பாக பட்டு வளர்ப்பு கொட்டகை, தளவாடப் பொருட்கள் மற்றும் மல்பரி இலை ஆகியவற்றை மானியத்தில் பெற்று தொழில் மேற்கொண்டு வரும் பயனாளிகளை சந்தித்து விவரங்களை கேட்டறிந்தார்.

செண்பகமாதேவி தொடக்க வேளாண்மை கூட்டுறவு கடன் சங்கத்திற்கும் விஜயம் செய்த கலெக்டர், அங்கு வழங்கப்பட்டுள்ள நகைக்கடன், பயிர்க்கடன் விவரங்களை ஆய்வு செய்தார். கடன் திருப்பிச் செலுத்தப்பட்ட விவரங்கள் மற்றும் நிலுவையில் உள்ள கடன் தொகை குறித்தும் விசாரித்தார். சங்கத்தில் இயங்கி வரும் இ-சேவை மையத்தின் செயல்பாடுகள், பயனாளிகளின் எண்ணிக்கை மற்றும் வழங்கப்படும் சேவைகள் குறித்தும் கேட்டறிந்தார்.

சுகாதாரத்துறை சார்பில் பருத்திப்பள்ளி துணை சுகாதார நிலையம் மற்றும் ராமாபுரம் அரசு ஆரம்ப சுகாதார நிலையத்திற்கும் ஆய்வுப் பயணம் மேற்கொண்டார். அங்கு தினசரி வரும் புறநோயாளிகளின் எண்ணிக்கை, மகப்பேறு சிகிச்சை விவரங்கள், மருந்துகளின் இருப்பு நிலை, மருத்துவர்கள் மற்றும் செவிலியர்களின் வருகைப் பதிவேடு, ஆய்வகப் பதிவேடு ஆகியவற்றை ஆய்வு செய்தார்.

இந்த ஆய்வுப் பயணத்தின் போது பொதுமக்கள் தங்கள் குறைகளை நேரடியாக கலெக்டரிடம் தெரிவித்தனர். அனைத்து குறைகளுக்கும் உரிய தீர்வு காணப்படும் என கலெக்டர் உறுதியளித்தார். பல்வேறு துறைகளின் திட்டங்கள் மக்களை சென்றடைவதை உறுதி செய்வதே இந்த திட்டத்தின் முக்கிய நோக்கம் என்றும் அவர் தெரிவித்தார்.

அரசு திட்டங்களின் பயன்கள் அனைத்து தரப்பு மக்களையும் சென்றடைவதை உறுதி செய்வதில் இது போன்ற நேரடி ஆய்வுகள் உதவியாக இருக்கும் என அதிகாரிகள் தெரிவித்தனர்.