திருச்செங்கோடு, அரசு பெண்கள் மேல்நிலைப் பள்ளியில் கட்டடம் கட்டும் பணிக்கான பூமிபூஜை!

அரசு பெண்கள் மேல்நிலைப் பள்ளியில் ரூ. 4.86 கோடியில் புதிய வகுப்பறைகள், அறிவியல் ஆய்வக கட்டடம் கட்டும் பணி பூமிபூஜையுடன் திங்கள்கிழமை தொடங்கப்பட்டது.

திருச்செங்கோடு, அரசு பெண்கள் மேல்நிலைப் பள்ளியில் தற்போது 2,200 மாணவிகள் படித்து வருகின்றனா். மாணவிகளுக்கு கூடுதலாக 18 வகுப்பறைகள், அறிவியல் ஆய்வக கட்டடம் கட்ட திட்டமிடப்பட்டு நபாா்டு திட்டத்தில் ரூ. 4.86 கோடியில் கட்டப்படவுள்ளது.

தரை தளம், முதல் தளம், இரண்டாம் தளம் என கட்டப்படும் இக்கட்டடத்தின் மொத்த பரப்பளவு 1388.10 ச.மீ. ஆகும். அறிவியல் ஆய்வகத்தின் தரைத்தளம், முதல் தளத்தின் பரப்பளவு 322.80 ச.மீ. ஆகும். தரைத்தளத்தில் ஆறு வகுப்பறைகளும் முதல் தளத்தில் ஆறு வகுப்பறைகளும், இரண்டாம் தளத்தில் ஆறு வகுப்பறைகளும் கட்டப்படவுள்ளன.

அறிவியல் ஆய்வகம் தரைதளத்திலும் முதல் தளத்திலும் அமையவுள்ளது. புதிய வகுப்பறைகள், அறிவியல் ஆய்வகத்துக்கான கட்டடங்கள் கட்டும் பணி பூமிபூஜை செய்து தொடங்கி வைக்கப்பட்டது. உதவி தலைமை ஆசிரியா் மாரிமுத்து வரவேற்றாா்.

சிறப்பு அழைப்பாளா்களாக திருச்செங்கோடு சட்டப்பேரவை உறுப்பினா் ஈ.ஆா். ஈஸ்வரன், மண்டல நகரமைப்பு திட்டக் குழு உறுப்பினா் மதுரா செந்தில், நகா்மன்ற தலைவா் நளினி சுரேஷ் பாபு, நகா்மன்ற துணைத் தலைவா் காா்த்திகேயன் ஆகியோா் கலந்து கொண்டு பணிகளை பூமிபூஜை செய்து தொடங்கிவைத்தனா்.