ஈரோடு : பட்டா வழங்க கோரி கோபி சப்-கலெக்டரிடம் மனு!

கோபி: பவானி தாலுகா, ஆப்பக்கூடல் கிராமம், காமராஜர் நகரை சேர்ந்த மக்கள், பட்டா வழங்க கோரி, கோபி சப்-கலெக்டர் சிவானந்தத்திடம் நேற்று மனு வழங்கினர். மனுவில் கூறியிருப்பதாவது:

கடந்த, 50 ஆண்டுகளாக, காமராஜர் நகரில், 26 குடும்பங்கள் வசிக்கிறோம். கூலி தொழிலாளியான நாங்கள் குடியிருக்கும் வீட்டு இடத்துக்கு, பட்டா கோரி பத்து ஆண்டுகளாக, கலெக்டர் அலுவலகம் முதல், தாசில்தார் வரை மனு கொடுத்துள்ளோம். பவானி தாலுகா அலுவலகத்தில் விபரம் கேட்டபோது, பட்டாவுக்காக பணி நடக்கிறது; வி.ஏ.ஓ., மற்றும் கோபி ஆர்.டி.ஓ., இடத்தை பார்க்க உள்ளதாகவும் பதில் கிடைத்தது.

ஆனால், இதுவரை அப்படி ஒன்று நடந்ததாக தெரியவில்லை. மனு மீது விரைவாக நடவடிக்கை எடுத்து, எங்களுக்கு பட்டா வழங்க நடவடிக்கை எடுக்க வேண்டும். இவ்வாறு தெரிவித்துள்ளனர். மனுவை பெற்ற சப்-கலெக்டர் சிவானந்தம், துறை ரீதியாக விசாரித்து நடவடிக்கை எடுப்பதாக தெரிவித்தார்.