ராஜீவ் கொலை வழக்கு: முருகனை லண்டனுக்கு அனுப்ப மத்திய அரசு எதிர்ப்பு

ராஜீவ் கொலை வழக்கு: முருகனை லண்டனுக்கு அனுப்ப மத்திய அரசு எதிர்ப்பு
சென்னை உயர்நீதிமன்றம்  (கோப்பு படம்)
ராஜீவ் கொலை வழக்கில் தண்டனை அடைந்த முருகனை லண்டனுக்கு அனுப்ப மத்திய அரசு எதிர்ப்பு தெரிவித்து உள்ளது.

முன்னாள் பிரதமர் ராஜீவ் காந்தி கடந்த 1991ம் ஆண்டு மே மாதம் தேர்தல் பிரச்சாரத்திற்காக தமிழ்நாட்டிற்கு வந்தார். சென்னை அருகே ஸ்ரீபெரும்புதூரில் அவர் பொதுக்கூட்ட மேடையில் ஏற முயன்றபோது மனித வெடிகுண்டு தாக்குதலில் கொல்லப்பட்டார். ராஜீவ் காந்தியை கொலை செய்ததாக விடுதலை புலிகள் இயக்கத்தை சேர்ந்தவர்கள் கைது செய்யப்பட்டனர்.

ராஜீவ் காந்தி கொலை வழக்கில் ஆயுள் தண்டனை கைதிகளாக இருந்த நளினி, முருகன், சாந்தன் உள்பட ஏழு பேரை விடுதலை செய்து, கடந்த 2022ம் ஆண்டு நவம்பர் மாதம் தீர்ப்பளித்தது.

இதையடுத்து விடுதலை செய்யப்பட்ட இலங்கை நாட்டைச் சேர்ந்த முருகன், சாந்தன் உள்ளிட்டோர் அகதிகள் முகாமில் அடைக்கப்பட்டுள்ளனர். இந்த நிலையில் சென்னை உயர் நீதிமன்றத்தில் முருகன் தாக்கல் செய்த மனுவில், லண்டனில் வசிக்கும் தன் மகளுடன் சேர்ந்து வாழ விரும்புவதால் பாஸ்போர்ட் கேட்டு விண்ணப்பிப்பதற்காக திருச்சி சிறப்பு முகாமிலிருந்து சென்னையில் உள்ள இலங்கை தூதரகம் சென்று வருவதற்கு பாதுகாப்பு வழங்க சென்னை காவல்துறைக்கு உத்தரவிடக் கோரி தொடரப்பட்ட வழக்கு நீதிபதிகள் கிருஷ்ணகுமார் மற்றும் தனபால் அமர்வில் விசாரணைக்கு வந்தது.

அப்போது, மத்திய அரசு தரப்பில் கூடுதல் சொலிசிடர் ஜெனரல் ஏ.ஆர்.எல்.சுந்தரேசன் ஆஜராகி, கொலை வழக்கில் குற்றவாளியான இலங்கையை சேர்ந்த முருகனை லண்டனுக்கு அனுப்ப முடியாது எனவும், இலங்கை நாட்டின் துணை தூதரகம் ஆவணங்களை வழங்கினால் மட்டுமே இலங்கைக்கும் திருப்பி அனுப்ப முடியும் என தெரிவித்தார்.

தமிழக அரசு தரப்பில், திருச்சி சிறப்பு முகாமிலிருந்து சென்னையில் உள்ள இலங்கை தூதரகத்திற்கு முருகனை அழைத்து வர காவல்துறை பாதுகாப்பு வழங்கப்படும் என தெரிவிக்கப்பட்டது. இதனை பதிவு செய்து கொண்ட நீதிபதிகள், முருகனுக்கு பயண ஆவணம் வழங்குவதற்கான நேர்காணலுக்கு இலங்கை தூதரகம் அழைக்கும் போது முருகனுக்கு பாதுகாப்பு வழங்க உத்தரவிட்டு வழக்கை முடித்து வைத்தனர்.

Tags

Next Story