மரவள்ளிக் கிழங்குக்கு உரிய விலை நிா்ணயம் செய்யக் கோரி தமிழக விவசாயிகள் சங்கத்தினா் ஆர்ப்பாட்டம்

சேலம் : மரவள்ளிக் கிழங்குக்கு உரிய விலை நிர்ணயம் செய்யக் கோரி, தமிழக விவசாயிகள் சங்கத்தினர் வெள்ளிக்கிழமை ஆர்ப்பாட்டத்தில் ஈடுபட்டனர்.

சேலம், குரங்குசாவடி பகுதியில் உள்ள சேகோ சர்வ் தலைமை அலுவலகம் முன் நடைபெற்ற ஆர்ப்பாட்டத்தில், தமிழ்நாடு விவசாயிகள் சங்க மாவட்டத் தலைவர் அன்பழகன், துணைத் தலைவர் தங்கவேல், செயலாளர் ராமமூர்த்தி, பொருளாளர் வெங்கடாசலம் உள்ளிட்டோர் கலந்துகொண்டனர்.

முத்தரப்புக் கூட்டத்தில் நடவடிக்கை எடுக்காத அரசைக் கண்டித்து போராட்டம்

இதில், முத்தரப்புக் கூட்டத்தில் விலை நிர்ணயத்துக்கு ஒப்புக்கொண்டு நடவடிக்கை எடுக்காத தமிழக அரசைக் கண்டித்து விவசாயிகள் மரவள்ளிக் கிழங்குகளை கையில் ஏந்தி முழக்கங்களை எழுப்பினர்.

இதுகுறித்து மரவள்ளிக் கிழங்கு விவசாயிகள் கூறுகையில், சேலம், நாமக்கல், திருச்சி, பெரம்பலூர், தருமபுரி, கள்ளக்குறிச்சி உள்ளிட்ட 21-க்கும் மேற்பட்ட மாவட்டங்களில் மரவள்ளிக் கிழங்கு பிரதான பணப்பயிராக சாகுபடி செய்யப்பட்டு வருகிறது.கடந்த ஆண்டு டன் ஒன்றுக்கு ரூ. 16 ஆயிரம் வரை கொள்முதல் விலை கிடைத்த நிலையில், தற்போது ஒரு டன்னுக்கு ரூ. 5 ஆயிரம் வரை விலை சரிவு ஏற்பட்டுள்ளது.

மத்திய அரசுக்கு விவசாயிகள் கோரிக்கை

• கம்போடியா மற்றும் ஆசிய நாடுகளில் இருந்து இறக்குமதி செய்யப்படும் மரவள்ளியால் உருவாக்கப்படும் பொருள்களுக்கு இறக்குமதி வரியாக மீண்டும் 50 சதவீதத்தை மத்திய அரசு விதிக்க வேண்டும்.
• முத்தரப்புக் கூட்டத்தில் ஒப்புக்கொண்டபடி, புள்ளிக்கு ரூ. 300 வழங்க வேண்டும்.
• அரசு உரிய கவனம் செலுத்தி விவசாயிகள் வாழ்வாதாரத்தை பாதுகாக்க நடவடிக்கை எடுக்க வேண்டும்.

மேலும் கூறுகையில், தற்போது மரவள்ளிக் கிழங்கு அறுவடை செய்யப்படும் காலகட்டமாக இருப்பதால், முத்தரப்புக் கூட்டத்தில் ஒப்புக்கொண்டபடி, புள்ளிக்கு ரூ. 300 வழங்க வேண்டும் என வலியுறுத்தினர்.

இப்பிரச்சனையில் அரசு உரிய கவனம் செலுத்தி விவசாயிகள் வாழ்வாதாரத்தை பாதுகாக்க நடவடிக்கை எடுக்க வேண்டும் எனவும் விவசாயிகள் வலியுறுத்தியுள்ளனர்.