பிரமாண்டமான 'இந்தியன்-2' பட செட்… படப்பிடிப்பில் பங்கேற்றார் கமல்..!

இயக்குநர் ஷங்கரின் இயக்கத்தில் 'இந்தியன்-2' படத்தின் படப்பிடிப்பு வேகமெடுக்கத் தொடங்கியுள்ளது. படப்பிடிப்பில் விபத்து உள்ளிட்ட பல்வேறு காரணங்களால், நிறுத்தி வைக்கப்பட்டிருந்த படப்பிடிப்பு மீண்டும் தொடங்கியுள்ளதால் படக்குழுவினர் உற்சாகத்தில் உள்ளனர்.

சென்னை சாலிகிராமத்தில் இப்படத்திற்காகப் போடப்பட்டுள்ள பிரமாண்ட செட்டில் நடந்த படப்பிடிப்பில் இன்று (22/09/2022) பங்கேற்றார் நடிகர் கமல்ஹாசன். அந்தப் புகைப்படங்களை கமல் தனது ட்விட்டர் பக்கத்தில் பகிர்ந்துள்ளார். கமலின் ட்விட்டர் பக்கத்தைப் பின் தொடரும் அவரது ரசிகர்களும் திரையுலகினரும் மகிழ்வான கமெண்ட்களைப் போட்டுக் கொண்டாடுகின்றனர்.

இந்நிலையில், 'இந்தியன்-2' படத்தின் படப்பிடிப்பு சென்னை சாலிகிராமத்திலேயே, தொடர்ந்து பத்து நாட்கள் நடைபெறும் என்கிறார்கள் படக்குழுவினர். லைகா நிறுவனத்துடன் ரெட் ஜெயண்ட் மூவீஸ் இணைந்து தயாரிக்கும் 'இந்தியன்-2' படத்தில் ரகுல் பிரீத் சிங், பாபி சிம்ஹா உள்ளிட்டோர் நடித்து வந்த நிலையில் இன்று நடிகர் கமல்ஹாசன் நடிக்கும் காட்சிகளும் தொடங்கப்பட்டுள்ளது குறிப்பிடத்தக்கது.