திரைப்படத் தயாரிப்பில் மீண்டும் களமிறங்கும் ஏவிஎம் நிறுவனம்..!

திரைப்படத் தயாரிப்புத் துறையில் சுமார் 70 ஆண்டுகளுக்கும் மேலாக இயங்கிவரும் ஏ.வி.எம் நிறுவனத்தின் மூன்றாவது தலைமுறை தற்கால சினிமாவுக்கு ஏற்றார்போல் அப்டேட்டாக, வெப் சீரிஸ் தயாரிப்பில் ஈடுபட்டுள்ளதற்கு திரையுலகத்தினர் மற்றும் ரசிகர்களிடமிருந்து பாராட்டுகள் குவிந்து வருகின்றன.

தமிழ் சினிமாவின் முன்னணி தயாரிப்பு நிறுவனமான ஏ.வி.எம்.புரொடக்ஷன்ஸ் 1945ல் இருந்து படத் தயாரிப்புத் துறையில் முன்னணி நிறுவனங்களில் ஒன்றாக இயங்கி வந்தது. இந்தநிலையில், 2014க்குப் பிறகு சினிமா தயாரிப்பிலிருந்து விலகியது. கடந்த எட்டு வருடங்களுக்குப் பிறகு, மீண்டும் ஏ.வி.எம் நிறுவனம் படத்தயாரிப்பில் இறங்கியுள்ளது.

தற்போது முதலில் ஏ.வி.எம் நிறுவனம், 'தமிழ் ராக்கர்ஸ்' என்ற வெப் சீரிஸை தயாரித்துள்ளது. இதில் அருண்விஜய், வாணி போஜன், ஐஸ்வர்யா மேனன் உள்ளிட்டோர் நடித்திருக்கின்றனர். இந்த வெப் சீரிஸை இயக்குநர் அறிவழகன் இயக்கியிருக்கிறார். இதன் டீசர் தற்போது வெளியிடப்பட்டுள்ளது.

திரைத்துறைக்கு அச்சுறுத்தலாக இருந்து வருவதாக தயாரிப்பாளர்களால் குற்றம் சுமத்தப்பட்டு வரும் பைரசி இணைய தளமான தமிழ் ராக்கர்ஸ் பற்றிய கதையாக இந்த சீரிஸ் உருவாக்கப்பட்டுள்ளது.