யோகா, சமூக விழிப்புணர்வில் சாதனை: தென்காசி மாணவிகளுக்கு பாராட்டு

தென்காசி மாவட்டம் கடையம் அருகே இரவணசமுத்திரத்தை சார்ந்த கூலித்தொழிலாளி முகம்மது நஸீருதீன்-ஜலிலா அலி முன்னிஸா தம்பதியரின் மகள் மிஸ்பா நூருல் ஹபிபா குற்றாலம் தனியார் பள்ளியில் பத்தாம் வகுப்பு பயின்று வருகிறார். இவர் இரண்டாம் வகுப்பு பயிலும் போதிலிருந்தே யோகா மற்றும் ரோலர் ஸ்கேட்டிங் கற்று வருகிறார். மாவட்டம், மாநிலம், தேசிய மற்றும் ஆசிய அளவில் யோகாசனப் போட்டிகளில் கலந்து சான்றிதழ்கள் பரிசுகள் வாங்கி குவித்து வருகிறார். போட்டிகள் மட்டுமில்லாமல் யோகா ஸ்கேட்டிங் மூலம் பொது மக்களிடையே விழிப்புணர்வு ஏற்படுத்தும் வகையில் பல சமூக விழிப்புணர்வு பிரச்சாரங்களையும் செய்து வருகிறார். தொடர்ந்து தேசிய அளவில் சாதனை சான்றிதழ்களும் பரிசுகளும் பெற்று வருகிறார். 

இவரை தொடர்ந்து பல்வேறு யோகாசன நிகழ்வுகள் திறனாய்வு போட்டிகளில் பங்கு பெற்ற இரவணசமுத்திரத்தை சேர்ந்த குற்றாலம் தனியார் பள்ளியில் மூன்றாம் வகுப்பு பயிலும் மாணவி சாஜிதா, எட்டாம் வகுப்பு மாணவி அப்ஷான், ஆழ்வார் குறிச்சியில் உள்ள தனியார் பள்ளி பத்தாம் வகுப்பு மாணவி ஜெய்த்துன் முஷிரா, திருநெல்வேலி சதக்கத்துல்லா அப்பா கல்லூரி மூன்றாம் ஆண்டு நிறைவு மாணவி ஜாஸ்மின் மீரா போன்ற மாணவிகளை இரவணசமுத்திரம் பஞ்சாயத்து தலைவர் முகம்மது உசேன் ஒன்றிய கவுன்சிலர் மணிகண்டன் கோவிந்த பேரி கூட்டுறவு சங்கத்தலைவர் உச்சிமாகாளி மற்றும் வார்டு உறுப்பினர்கள் ஆகியோர் மாணவிகளை மென்மேலும் வளர்ந்து தமது கிராமத்திற்கும் நாட்டிற்கும் பெயர் சேர்க்க வேண்டும் என்று வாழ்த்தி பாராட்டு தெரிவித்தனர்.

இதில் யோகா மற்றும் ஸ்கேட்டிங் விளையாட்டு ஆசிரியர் குரு கண்ணன் சமூக ஆர்வலர்கள் சேக் முகம்மது அலி, முன்தஸுர் மாணவிகள் குடுபத்தினர் ஊர் பொதுமக்கள் பல்வேறு கட்சி பிரமுகர்கள் கலந்து கொண்டனர். முடிவில் நடந்து முடிந்த உள்ளாட்சி தேர்தலில் வெற்றி பெற்ற தங்களது ஊர் பஞ்சாயத்து தலைவர் ஒன்றிய கவுன்சிலர் வார்டு உறுப்பினர்கள் போன்ற அனைவருக்கும் மாணவிகள் தங்களது குடும்பத்தினருடன் வாழ்த்து தெரிவித்தனர்.