முட்டை விலை 3 நாட்களில் 75 பைசா சரிவு - ஒரு முட்டை ரூ. 4.60: பண்ணையாளர்கள் கவலை..!

நாமக்கல் :

நாமக்கல் மண்டலத்தில் முட்டை விலை 3 நாட்களாக தொடர் சரிவு ஏற்பட்டு ஒரு முட்டைக்கு 75 பைசா சரிவடைந்ததால் பண்ணையாள்ர்கள் கவலை அடைந்துள்ளனர்.

நாமக்கல், சேலம், ஈரோடு, பெருந்துறை, கோவை உள்ளிட்ட நாமக்கல் மண்டலத்தில், 1,000க்கும் மேற்பட்ட கோழிப்பண்ணைகள் உள்ளன. இங்கு 6 கோடி முட்டைக் கோழிகள் வளர்க்கப்படுகின்றன. தினசரி சுமார் 5 கோடி முட்டைகள் உற்பத்தி செய்யப்படுகிறது. முட்டைகள் தமிழக அரசின் சத்துணவு திட்டத்திற்கும், வெளிநாட்டிற்கும் ஏற்றுமதி செய்யப்படுகிறது. மேலும், கேரளா உள்ளிட்ட வெளி மாநிலங்களுக்கும், தமிழகத்தின் பல்வேறு மாவட்டங்களுக்கும், விற்பனைக்காக தினசரி லாரிகள் மூலம் அனுப்பி வைக்கப்படுகிறது.

தேசிய முட்டை ஒருங்கிணைப்புக்குழு (என்இசிசி), தினசரி பண்ணைகளில் ரொக்க விற்பனைக்கு, முட்டை விலையை அறிவித்து வருகிறது. அதை பண்ணையாளர்கள் கடைபிடித்து வருகின்றனர். கடந்த 1ம் தேதி முதல் 4ம் தேதி வரை ஒரு முட்டை விலை ரூ. 5.30 ஆக இருந்தது. பின்னர் 5ம் தேதி 25 பைசா, 6ம் தேதி 25 பைசா குறைந்து ஒரு முட்டை ரூ. 4.85 ஆக இருந்தது. இந்த நிலையில் இன்று  மாலை நாமக்கல் மண்டல என்இசிசி தலைவர் சிங்கராஜ் தலைமையில் நடைபெற்ற, என்இசிசி கூட்டத்தில் முட்டை விலை மேலும் 25 பைசா குறைக்கப்பட்டு, ஒரு முட்டையின் பண்ணைக்கொள்முதல் விலை ரூ. 4.60 ஆக நிர்ணயிக்கப்பட்டது. 3 நாட்களில் ஒரு முட்டைக்கு 75 பைசா சரிவடைந்ததால் பண்ணையாளர்கள் கவலை அடைந்துள்ளனர்.

முக்கிய நகரங்களில் ஒரு முட்டையின் விலை (பைசாவில்) : சென்னை 570, பர்வாலா 410, பெங்களூர் 530, டெல்லி 440, ஹைதராபாத் 430, மும்பை 520, மைசூர் 533, விஜயவாடா 450, ஹொஸ்பேட் 485, கொல்கத்தா 485.

கோழிவிலை: பிராய்லர் கோழி உயிருடன் ஒருகிலோ ரூ. 138 ஆக பிசிசி அறிவித்துள்ளது. முட்டைக்கோழி உயிருடன் ஒரு கிலோ மைனஸ் இல்லாத விலை ரூ. 92 ஆக தென்னிந்திய கோழிப்பண்ணையாளர்கள் சங்கம் (சிகா) நிர்ணயித்துள்ளது.