படகு சவாரி சென்ற தொழிலதிபர் ஏரியில் தவறி விழுந்து மரணம்

பொன்னேரி அடுத்த பழவேற்காட்டில் தடையை மீறி படகு சவாரி சென்ற இறால் பண்ணை உரிமையாளர் நீரில் தவறி விழுந்து உயிரிழந்த சம்பவம் பரபரப்பு .

சென்னை நங்கநல்லூரை சேர்ந்த அருண் (47) இவருக்கு திருவள்ளூர் மாவட்டம், பொன்னேரி அடுத்த தேவதானம் அருகே இறால் பண்ணை நடத்தி வருகிறார். இவர் தமது நண்பர்கள் மற்றும் ஊழியர்களுடன் பழவேற்காட்டில் நேற்று மதியம் சுற்றுலா சென்றுள்ளார். பழவேற்காடு ஏரியில் படகு சவாரிக்கு தடை செய்யப்பட்டுள்ள நிலையில், தடையை மீறி அருண் படகு சவாரி சென்றுள்ளார். முகத்துவாரம் அருகே சென்று விட்டு மீண்டும் பழவேற்காடு திரும்பிக் கொண்டிருந்த பொழுது படகிலிருந்து தவறி விழுந்து அருள் நீரில் மூழ்கியுள்ளார்.

இதனால் அதிர்ச்சி அடைந்த அவரது நண்பர்கள் மற்றும் அருகில் இருந்த மீனவர்கள் நீரில் குதித்து நீண்ட நேரம் தேடி பின்னர் நீரில் மூழ்கிய அருணை மீட்டு சிகிச்சைக்காக பழவேற்காடு அரசு மருத்துவமனைக்கு கொண்டு சென்றனர். அங்கு பரிசோதித்த மருத்துவர்கள் அருண் ஏற்கெனவே இறந்து விட்டதாக தெரிவித்தனர்.

இதனை அடுத்து உயிரிழந்த இறால் பண்ணை உரிமையாளர் அருண் சடலம் பிரேத பரிசோத னைக்காக பொன்னேரி அரசு மருத்துவமனைக்கு அனுப்பி வைக்கப்பட்டுள்ளது. இதுகுறித்து திருப்பாலைவனம் போலீசார் வழக்கு பதிவு செய்து விசாரணை மேற்கொண்டு வருகின்றனர். தடையை மீறி பழவேற்காடு ஏரியில் நண்பர்களுடன் படகு சவாரி சென்றவர் நீரில் தவறி விழுந்து உயிரிழந்த சம்பவம் பரபரப்பை ஏற்படுத்தி உள்ளது.