செங்குன்றத்தில் வாகனம் மோதி தனியார் நிறுவன சூபர்வைசர் உயிரிழப்பு

சென்னை புழல் அடுத்த கதிர்வேடு சிவராஜ் தெருவைச் சேர்ந்தவர் ஞானப்பிரகாசம்.  இவரது மகன் பிலிப் ராஜ் (வயது 59) இவர் கதிர்வேடு பகுதியில் உள்ள தனியார் நிறுவனத்தில் சூபர்வைசராக வேலை செய்து வந்தார்.

இவர் அலுவலக வேலையாக செங்குன்றத்தை அடுத்த பாடிநல்லூரில் உள்ள வட்டார போக்குவரத்து அலுவலகத்திற்கு சென்று விட்டு பின்னர் தனது இருசக்கர வாகனத்தில் கதிர்வேடு வந்துகொண்டிருந்தார். வழியில் செங்குன்றம் ஜி என் டி சாலை வடகரை சந்திப்பு அருகே வந்துகொண்டிருந்த போது இவருக்கு பின்னால் வந்த அடையாளம் தெரியாத வாகனம் பிலிப்ஸ்ராஜ் வாகனத்தின் மீது மோதியதில் நிலைதடுமாறி பிலிப்ஸ் ராஜ் கீழே விழுந்தார்.

கீழேவிழுந்த அவர் சுதாரிப்பதற்குள் அதே வாகனத்தின் சக்கரத்தில் தலை நசுங்கி ரத்த வெள்ளத்தில் சம்பவ இடத்திலேயே பரிதாபமாக துடிதுடித்து இறந்தார் .இது குறித்து தகவல் அறிந்த செங்குன்றம் போக்குவரத்து போலீஸ் இன்ஸ்பெக்டர் ராஜேஷ் மற்றும் போலீசார் சம்பவ இடத்திற்கு வந்து உடலை மீட்டு சென்னை அரசு ஸ்டான்லி மருத்துவமனைக்கு பிரேத பரிசோதனைக்காக அனுப்பி வைத்தனர் .

இதுகுறித்து மாதவரம் போக்குவரத்து புலனாய்வு பிரிவு போலீஸ் இன்ஸ்பெக்டர் அப்துல்காதர் மற்றும் போலீசார் சம்பவ இடத்திற்கு வந்து பார்வையிட்டு இதுகுறித்து வழக்குப்பதிவு செய்து அப்பகுதியில் உள்ள சி.சி.டி.வி. கண்காணிப்பு கேமரா பதிவுகளை ஆய்வு செய்து விபத்திற்கு காரணமான அடையாளம் தெரியாத வாகனத்தை தேடி வருகின்றனர்.