பொன்னேரி அருகே முன்விரோதம் காரணமாக இரு சக்கர வாகனத்திற்கு தீ வைப்பு

பொன்னேரி பேருந்து நிலையம் அருகே முன்விரோதம் காரணமாக இளைஞரின் இருசக்கர வாகனத்திற்கு தீ வைக்கப்பட்டது பற்றி காவல்துறையினர் விசாரணை நடத்தி வருகிறார்கள்.

திருவள்ளூர் மாவட்டம், பொன்னேரி பேருந்து நிலையம் அருகே திடீரென இருசக்கர வாகனம் ஒன்றின் மீது மர்ம நபர்கள் சிலர் பெட்ரோலை ஊற்றி தீ வைத்து விட்டு அங்கிருந்து தப்பி சென்றனர். இதில் இருசக்கர வாகனம் கொழுந்து விட்டு தீப்பற்றி எரிந்தது. இதுகுறித்து பொதுமக்கள் அளித்த தகவலின் பேரில் சம்பவ இடத்திற்கு வந்த பொன்னேரி தீயணைப்பு வீரர்கள் தண்ணீரை பீய்ச்சி அடித்து தீயை அணைத்தனர்.

தொடர்ந்து நடத்திய விசாரணையில் தீக்கிரையாக்கப்பட்ட இருசக்கர வாகனம் மதன் என்ற இளைஞருடையது எனவும், மாலையில் இவருக்கும் சிலருக்கும் இடையே தகராறு ஏற்பட்டதும், அதன் தொடர்ச்சியாக இருசக்கர வாகனத்தை மற்றொரு தரப்பினர் தீ வைத்து கொளுத்தியதும் விசாரணையில் தெரியவந்துள்ளது. இந்த சம்பவம் தொடர்பாக பொன்னேரி போலீசார் விசாரணை நடத்தி வருகின்றனர். பேருந்து நிலையம் அருகே இருச்சக்கர வாகனம் தீப்பற்றி எரித்த சம்பவம் அப்பகுதியில் பரபரப்பு ஏற்படுத்தியது.