விவசாயி வீட்டின் கதவை உடைத்து 12 சவரன் தங்க நகைகள் கொள்ளை

பெரியபாளையம் அடுத்த செங்காளம்மன் கண்டிகை கிராமத்தில் விவசாயி வீட்டின் பூட்டை உடைத்து 12 சவரன் தங்க நகைகள் கொள்ளையடித்த மர்ம நபர்களை போலீசார் வலை வீசி தேடி வருகிறார்கள்.

திருவள்ளூர் மாவட்டம், எல்லாபுரம் ஒன்றியம், பூரிவாக்கம் அருகே செங்காளம்மன் கண்டிகை கிராமம் உள்ளது. இக்கிராமத்தைச் சேர்ந்தவர் விவசாயி வினோத்குமார்(வயது38) ஆவார்.இவரது மனைவி பிரியங்கா. இத்தம்பதியரின் குழந்தைகள் சென்னையில் உள்ள தனியார் ஆங்கிலப் பள்ளியில் படித்து வருகின்றனர்.இதனால் அண்ணா நகரில் வீடு எடுத்து அங்கு தனது மனைவி மற்றும் குழந்தைகள் வசித்து வருகின்றனர்.வினோத் குமார் மட்டும் விவசாயம் செய்வதால் செங்காளம்மன் கண்டிகை கிராமத்தில் உள்ள வீட்டில் வசித்து வருகிறார்.மேலும், சனிக்கிழமை மற்றும் ஞாயிற்றுக்கிழமை ஆகிய இரண்டு நாட்கள் மட்டும் சென்னை அண்ணாநகருக்கு சென்று மனைவி மற்றும் குழந்தைகளுடன் இருப்பார்.

இதேபோன்று கடந்த வெள்ளிக்கிழமை மதியம் வினோத்குமார் வீட்டை பூட்டிக்கொண்டு சென்னைக்கு சென்றார். இந்நிலையில்,நேற்று முன் தினம் மாலை வீடு திரும்பினார்.அப்போது வினோத் குமாருக்கு அதிர்ச்சி காத்திருந்தது.மர்ம நபர்கள் வீட்டின் கதவை உடைத்துக் கொண்டு உள்ளே புகுந்து பீரோவை உடைத்து அதிலிருந்து 12 சவரன் தங்க நகைகளை கொள்ளையடித்துக் கொண்டு தப்பி சென்றதைக் கண்டு அதிர்ச்சி அடைந்தார்.

இந்த கொள்ளை சம்பவம் குறித்து பெரியபாளையம் காவல் நிலையத்தில் புகார் செய்தார்.போலீசார் சம்பவ இடத்துக்கு விரைந்து வந்து விசாரணை மேற்கொண்டனர். மேலும்,வழக்கு பதிவு செய்து கொள்ளை சம்பவத்தில் ஈடுபட்ட மர்ம நபர்களை வலை வீசி தேடி வருகின்றனர். விவசாயி வீட்டில் நடைபெற்ற கொள்ளை சம்பவம் இக்கிராமத்தில் பெரும் பரபரப்பை ஏற்படுத்தி உள்ளது.