மெழுகுவர்த்தி ஏந்தி ஆர்ப்பாட்டம் நடத்திய சத்துணவு ஊழியர்கள்

கோவை மாவட்ட ஆட்சியர் அலுவலகம் முன்பு சத்துணவு ஊழியர்கள் சங்கத்தின் சார்பில் தமிழக அரசை கண்டித்து மெழுகுவர்த்தி ஏந்திய ஆர்ப்பாட்டம் நடைபெற்றது.

தமிழக சட்டமன்றத்தில் இன்று நடைபெற்ற சமூக நலன் மானிய கோரிக்கையில் சத்துணவு ஊழியர்களின் கோரிக்கைகள் தொடர்பாக அறிவிப்பு வெளியாகும் என எதிர்பார்த்து காத்திருந்தனர். இந்த நிலையில் இன்றைய மானியத்தில் தமிழக முதல்வர் தேர்தல் கால வாக்குறுதியில் அளித்தபடி எந்த கோரிக்கையையும் நிறைவேற்ற வில்லை என சத்துணவு ஊழியர் சங்கங்கள் எதிர்ப்பு தெரிவித்துள்ளன.

இதன் ஒரு பகுதியாக கோவை மாவட்ட ஆட்சியர் அலுவலகம் முன்பு தமிழ்நாடு சத்துணவு ஊழியர்கள் சங்கத்தின் சார்பில் மானியத்தில் சத்துணவு ஊழியர்களுக்கு அறிவித்த தேர்தல் கால வாக்குறுதியை நிறைவேற்றாததை கண்டித்து மெழுகுவத்தி ஏந்தி ஆர்ப்பாட்டம் நடைபெற்றது. இந்த ஆர்ப்பாட்டத்தில் 400 க்கும் மேற்பட்ட சத்துணவு ஊழியர்கள் கலந்து கொண்டு சிறப்பு கால முறை ஊதியத்தை நீக்கி, காலமுறை ஊதியம் வழங்கிட வேண்டும், குறைந்தபட்ச ஓய்வூதியம் ரூபாய் 9000 வழங்கிட வேண்டும் உள்ளிட்ட கோரிக்கைகளை வலியுறுத்தி கோஷம் எழுப்பினர்.

அதேபோல தற்போது நடைபெறும் மெழுகுவர்த்தி ஏந்திய ஆர்ப்பாட்டம் மென்மையான ஆர்ப்பாட்டம் என்றும் அடுத்த கட்டமாக ஆட்சிக்கு எதிர்ப்பு தெரிவிக்கும் வகையில் சத்துணவு ஊழியர்கள் தங்களது கோரிக்கை நிறைவேற்றப்படாவிட்டால் தீச்சட்டி ஏந்தி போராட்டம் நடத்துவோம் எனவும் ஆர்ப்பாட்டத்தில் தெரிவித்தனர்.

இதுகுறித்து தமிழ்நாடு சத்துணவு ஊழியர் சங்கத்தின் மாவட்ட தலைவர் ராமசாமி கூறியதாவது: ஆட்சிக்கு வருவதற்கு முன்னால் சத்துணவு ஊழியர்களின் சம்பளத்தை உயர்த்துவதாகவும் நாங்கள் ஆட்சிக்கு வந்தால் கோரிக்கைகள் நிறைவேற்றப்படும் எனவும் வாக்குறுதி கொடுத்த அரசு. இரண்டு வருடம் ஆகிறது. இன்று வரையில் ஒரு துரும்பை கூட நிறைவேற்ற வில்லை. இந்த அரசு எங்களை வஞ்சிக்க பார்க்கிறது. முதற்கட்டமாக மெழுகுவத்தி ஏந்தி ஆர்ப்பாட்டம் நடத்துகிறோம். அடுத்தகட்டமாக தீச்சட்டி ஏந்தி போராட்டம் நடத்தப்படும்.சத்துணவு மானிய கோரிக்கை நிறைவேறும் என கனவோடு காத்திருந்தோம். ஆனால் மானிய கோரிக்கையில் ஏமாற்றம் அடைந்தோம்.ஏன் இந்த ஆட்சியை அமைத்தோம் என்று எண்ணத்தை ஏற்படுத்துகிறது.