ரயில்வே மேம்பால பணிக்கு 'சிக்னல்' கிடைக்குமா? தொடரும் வாகன ஓட்டிகளின் அவதி!

புதுக்கோட்டை மாவட்டம், குளத்தூர் அருகே உள்ள களமாவூரில், திருச்சி-ராமேஸ்வரம் தேசிய நெடுஞ்சாலையை அகலப்படுத்தும் பணிக்கு, மத்திய அரசால் நிதி ஒதுக்கீடு செய்யப்பட்டு, இந்திய தேசிய நெடுஞ்சாலை ஆணையத்தின் மதுரைத் திட்ட அலுவலர் மேற்பார்வையில், 2006ஆம் ஆண்டு பணி தொடங்கப்பட்டது.

இதில், திருச்சி புதுக்கோட்டை இடையேயான 50 கிலோமீட்டர் தொலைவிற்கு, கீரனூர் - களமாவூர் பகுதியில் ரயில்வே பாதை குறுக்கிடுகிறது. இதற்கான உயர்மட்ட பாலம் முடிந்த நிலையில், இணைப்பு சாலை பணி மட்டும் நிறைவடையவில்லை.  குறிப்பிட்ட காலத்திற்குள் பணி முடிக்காத ஒப்பந்ததாரர்களுக்கு அபராதம் விதிக்க இந்திய தேசிய நெடுஞ்சாலை ஆணையம் உத்தரவிட்டது.

இதனால், பணியை மீண்டும் தொடராமல் அப்படியே போட்டு விட்டு சென்று விட்டனர். மற்றொரு ஒப்பந்ததாரர் மூலம் பணி தொடங்க உத்தரவிடப்பட்டது. கீரனூர் - களமாவூர் சாலை,  1/2 கிலோமீட்டர் தூரம் கொண்டது. இம்மேம்பால சாலை பணிக்காக அமைக்கப்பட்டிருந்த மாற்றுச்சாலை,  குண்டும் குழியுமாக உள்ளது. சாலை பணிகள் மிக மெதுவாக நடைபெற்று வருகின்றன.

கடந்த 14 ஆண்டுகளாக இந்த பணி நிறைவடையாததால், வாகன ஓட்டிகள் ஒற்றையடிப் பாதையில் செல்வது போல், வாகனத்தில்  சென்று கொண்டிருக்கின்றன. இதனால், பொதுமக்களும் கடும் அவதிக்குள்ளாகின்றனர். இந்த மேம்பால பணி ஆமை வேகத்தில் நடைபெறுவதால், மது பிரியர்களின் இரவுநேர மதுபான கூடமாகவும்  காட்சியளிக்கின்றது.