திடீரென தீப்பிடித்து எரிந்த பேருந்து: அதிர்ஷ்டவசமாக உயிர் தப்பிய பயணிகள்

கோவை மாவட்டம் பொள்ளாச்சியில் இருந்து, கோவை உக்கடம் பேருந்து நிலையத்திற்கு இன்று காலை அரசு பேருந்து 30 பயணிகளுடன் வந்து கொண்டிருந்தது.

இந்தப் பேருந்து ஒத்தக்கால் மண்டபம் அருகே வந்த போது, பேருந்தின் முன் பகுதியில் எஞ்சினில் இருந்து புகை வந்துள்ளது. இதனைப் பார்த்த ஓட்டுனர் உடனடியாக பேருந்தை நிறுத்திய நிலையில், பயணிகள் அனைவரையும் இறங்குமாறு நடத்துனர் அறிவுறுத்தினார்.

இதன்படி பயணிகள் அனைவரும் இறங்கிய நிலையில் பேருந்து முழுவதும் தீப்பிடித்து எரிந்தது. சில நிமிடங்களில் தீ மளமளவெனப் பரவி பேருந்து முழுவதும் பற்றி எரிந்தது. இது குறித்து தீயணைப்புத் துறையினருக்கு தகவல் தெரிவிக்கப்பட்ட நிலையில், சம்பவ இடத்திற்கு தீயணைப்பு துறையினர் விரைந்து வந்தனர்.

பின்னர் தீயணைப்பு துறையினர் சுமார் அரை மணி நேரம் போராடி தீயை அணைத்தனர். இந்த தீ விபத்து தொடர்பாக காவல் துறையினர் விசாரணை மேற்கொண்டு வருகின்றனர். மேலும் தீ விபத்திற்கான காரணம் குறித்தும் காவல் துறையினர் விசாரணை நடத்தி வருகின்றனர்.‌ பயணிகளுடன் வந்து பேருந்து தீப்பிடித்து எரிந்த சம்பவம் அப்பகுதியில் பரபரப்பை ஏற்படுத்தியது.